israiliyening iranliq yadro mutexessisi fahrizadege süyiqest qilghanliqi otturigha chiqmaqta
bir israiliye emeldari iranning yadro programmisida közge körüngen shexslerdin muhsin fahrizadening süyiqest bilen öltürülüshi heqqide toxtilip: «dunya israiliyege rehmet éytishi kérek» dédi.
türkiye awazi radiyosi xewiri: iranliq mutexessis fahrizadening süyiqest bilen öltürülüshining tesiri dawamlishiwatqan bir peytte, amérikada chiqidighan niyu york waqti géziti (NYT) gézitige bayanat bergen we ismini ashkarilashni xalimighan israiliye emeldarining qilghan sözliri hemmining diqqitini tartti.
israiliye hökümiti fahrizadeni öltürgenlikini resmiy yosunda qobul qilmighan bolsimu, emma mezkur israiliye emeldari tél awiw hökümitining süyiqestni teshkilligenlikini étirap qilghan boldi.
israiliye emeldari fahrizadening her bir tashlighan qedemlirini nazaret qilish wezipisini özining üstige alghanliqini bayan qilip: «iranning yadro pilanigha qarshi zörür bolghan qedemlerni tashlashni dawamlashturimiz. fahrizade ependi berpa qilghan iranning yadro qoralgha ige bolush arzusi, muhim bir tehdit shekillendurmekte idi. (fahrizadening öltürülüshi heqqide) israiliyege rehmet éytilishi lazim» dédi.
iranning yadro programmisidiki muhim shexslerning biri bolghan fahrizade, jüme küni (2020-yili 27-noyabir) téhranning démawend nahiyesige qarashliq abserd rayonida aptomobiligha qilinghan qoralliq hujumda qaza qilghan idi.
israiliye bash ministiri bényamin nétanyahumu 2018 - yili aprélda sunghan doklatida, «iran yadro pilanining tüzgüchisi» dep tonulghan fahrizadening ismini alahide tilgha alghan idi.
israiliyede chiqidighan «yédiot axronot» gézitining xewirige asaslanghanda, nétanyahu bu mesile toghrisida ötküzgen axbarat élan qilish yighinida, israiliyening fahrizadening qestlep öltürülüshide rol oynighanliqini ima qilghan idi.
