engiliye bilen firansiye qanunsiz köchmenlik dolqinini tosup qilish kélishimi imzalidi

türkiye awazi radiyosi xewiri: engiliye ichki ishlar ministirliqi teripidin élan qilinghan yazma bayanatta, ministir priti patél bilen firansiyelik mensepdishi gérald darman otturisida imzalanghan kélishimge asasen firansiye déngiz qirghiqida charlash wezipisi ötewatqan ofétsirlarning sanining bir hesse ashurilishi we qanunsiz köchmenlikni tosush üchün yéngi üskünilerning ishlitilidighanliqi bildürüldi.

bayanatta, panahlanghuchilarni jinayet shaykiliridin qutuldurush üchün firansiyede muwapiq panahlinish orni tesis qilish qedemlirini qollash, köchmenlerning bixeter üchinchi bir dölettin panahliq tilishige yardem qilish, etkeschilik we yük tiransportini asas qilghan qanunsiz köchmenlik dolquni tehditidin saqlinish üchün firansiyening shimaliy we gherbiy déngiz sahilliridiki portlarda chégra bixeterlikini kücheytish qatarliq mesililerde kélishim hasil qilinghanliqi tekitlendi.

bayanatta ministir patélning qarashlirighimu orun bérilgen bolup, bu kélishimning ikki döletning mansh déngizidiki qanunsiz ötüsh yollirini imkansiz halgha keltürüsh tirishchanliqining ilghar qedimige wekillik qilidighanliqi uqturuldi.

patél firansiye bilen imzalanghan kélishimdin bashqa yene, dölette puxta we adil yéngi panahlinish sistémisi berpa qilidighanliqini bayan qilip, buning üchün kéler yili yéngi qanun chiqirilidighanliqini hembehirlidi.

patél axbarat élan qilish yighinida bolsa, firansiye dairilirining bu yil 5000 panahlanghuchining engiliyege méngishini tosup qalghanliqini we yéqinqi on yilda engiliyening köchmenlikke qarshi küresh üchün firansiyege 150 milyon fondstérling bergenlikini éytti.