engliye bilen yawropa ittipaqi otturisida ixtilap dawamlishiwatidu

türkiye awazi radiyosi xewiri: yawropa ittipaqining engliyening yawropa ittipaqidin ayrilishi bash muzakirechisi mishél baghini (Michel Barnier) twittérda, yawropa ittipaqi bilen engliye otturisida dawamlishiwatqan muzakireler toghrisida uchur hembehirlidi.

u terepler arisida béliqchiliq, dölet yardimi we kelgüside yüz bérish éhtimali bolghan ixtilaplar mesiliside hazirche kélishim hasil qilinmighanliqini bildürdi. u mundaq dédi:

«muhim pikir ixtilapliri dawamlishiwatidu. yawropa ittipaqi we engliye otturisidiki muzakirelerni dawamlashturush üchün, guruppidikiler birlikte londongha barimiz.»

u bügün (2020-yili 27-noyabir) yawropa ittipaqi döletliri we yawropa parlaménti ezalirigha muzakireler heqqide melumat béridighanliqini qeyt qildi.

ötken hepte bir muzakirechining wuxen wirusi(Kovid-19)  yuqumlanghanliqining bayqilishi sewebidin, engliyening ittipaqtin ayrilish muzakireliri toxtitilghan we arqidin sin yighinliri bilen dawamlashqan idi. yawropa ittipaqidin 2020-yili 31-yanwar resmiy ayrilghan engliye, ittipaq bilen sodini asas qilghan halda ikki terep munasiwetliri toghrisida keng dairilik muzakirelerni dawamlashturmaqta.

yawropa ittipaqi bilen engliye otturisidiki muzakirelerde «adil riqabetni kapaletke ige qilish», soda ixtilaplirini qandaq hel qilish» we «béliqchiliq», ixtilapliq mesililer bolup hésablinidu. kélishim hasil qilinmighan ehwalda ikki terep otturisidiki soda munasiwetliri 2020-yili 31-dékabirdin kéyin, dunya soda teshkilatining belgilimiliri boyiche bolidu.

engliye ashu waqitqiche bolghan ötkünchi mezgilde, yawropa ittipaqining belgilimiliri boyiche ish qilidu.