amérika bilen firansiye qarabagh mesiliside rusiyedin renjidimu?

türkiye awazi radiyosi xewiri: lawrow «bügünki rusiye» (Russia Today) qaniligha bergen bayanatida, rusiyening amérika we firansiyeni taghliq qarabaghdiki kélishim musapisige qatnashturmighanliqi toghrisidiki eyibleshlerge jawab berdi. u mundaq dédi:

«amérika we firansiye kélishimde telep qilinghan sharaitni yaritishta muhim siyasiy rol oynidi. firansiye pirézidénti makronning rusiye pirézidénti wladimir putin bilen körüshkende, shundaqla méning amérika we fransiyelik mensepdashlirim bilen taghliq qarabagh toghrisidiki uchrishishlirimda ularning renjigenliki bilinip turidu. bu kishini tolimu biaram qilidu.»

lawrow özining firansiye tashqi ishlar ministiri zhan yiwés lé driyan (Jean-Yves Le Drian) gha taghliq qarabaghda kishilerning öltürülmeslikini, öyliridin ayrilmasliqini, musapirlar we yurt-makanliridin ayrilghanlar sanining ashmasliqini xalaydighanliqini chüshendürmekchi bolghanliqini bildürdi.

u her bir minut kishi hayatigha oxshash qimmetlik bolghan waqitta, washington we parizhgha téléfon qilip, ularning kélishimning shertlirini qollaydighan yaki qollimaydighanliqi toghrisida pikir hasil qilishqa urunushning muwapiq bolmaydighanliqini eskertti.

u rusiyeni eyibleshning toghra we exlaqiy bolmighanliqini tekitlep, yawropa ittipaqigha oxshash köp tereplimilik qurulmilarda özining ornini kücheytish we siyasette «parlaq» bolush arzusining aldinqi pilangha chiqishining, kishini qayghugha salidighanliqini alahide eskertti.

u rusiyening qilghanlirining xelqara jemiyetning qollishigha érishkenlikidin xushal bolghanliqlirini tilgha élip, süriyede, taghliq qarabaghda we bashqa jaylarda eng muhim nishanlirining toqunush we kirizistin saqlinish ikenlikini ilgiri sürdi