jo baydin pirézidént bolushqa yéqinlashti

türkiye awazi radiyosi xewiri: «washington pochtisi géziti» ning xewiride bildürülishiche, jorjiya (Georgia) ishtatida saylam bélitining %98 i sanalghan bolup, baydin 2 milyon 449 ming 371 awazgha érishken. jumhuriyetchilerning namzati pirézidént tramp 2 milyon 448 ming 454 awazgha érishken.

saylam netijiliri yéngilanghandin kéyin, tünügün (2020-yili 5-noyabir) din bashlap trampning 1 ming 267 awaz üstünlüki bilen dawamlashqan riqabet, 917 awaz üstünlük bilen baydingha paydiliq bolup özgerdi.

16 wekilge ige mezkur ishtattiki saylam bélitini sanash ishliri dawam qilmaqta.

amérikada pirézidéntliq saylimi ötküzülginige ikki kün bolghan bolsimu, qaysi namzatning ghelibe qilidighanliqi éniqsiz halette. saylam bélitini sanash ishliri axirlashqan ishtatlardiki netijilerge asaslanghanda, démokrat partiyening namzati sabiq muawin pirézidént jo baydin 264, jumhuriyetchilerning namzati pirézidént tramp 214 saylighuchi wekil sanigha érishken.

amérikada bir ishtatta köp sangha érishken namzat, u ishtatning nopusigha asasen belgilengen saylighuchi wekil sanining hemmisige érishidu. bir namzatning pirézidéntliq saylimida ghelibe qilishi üchün jemiy 270 saylighuchi wekil sanigha érishishi kérek.

jemiy 71 saylighuchi wekilge ige pénsilwaniye, shimaliy karolina, jorjiya, arizona, néwada we alaska ishtatlirida saylam netijiliri jezmleshmidi. pénsilwaniye, shimaliy karolina we alaska ishtatlirida tramp aldida. néwada, arizona we jorjiyada baydin aldida. baydin saylam netijiliri jezmleshmigen alte ishtat ichide özi aldida turghan arizona, néwada we jorjiyada ghelibe qilsa 33 saylighuchi wekil bilen jemiy sanni 286 ge chiqirip, kéreklik bolghan 270 wekil sanidin ashidu.

pirézidént tramp pénsilwaniye, shimaliy karolina we alaskada ghelibe qilsa jemiy 38 saylighuchi wekilge ériship, jemiy wekil sanini 252 ge chiqarghan bolidu, emma utturghan bolidu.

saylam riqabiti keskin dawamlishiwatqan ishtatlarning saylam netijisining özgirishi, her ikki namzat üchün hel qilghuch ehmiyetke ige.