amérika rusiye bilen uran importini qisqartish ramka kélishimi imzalidi
amérika soda ministirliqi, rusiye dölet atom énérgiyisi orgini - rosatom bilen amérika yadro sanaitini kücheytish üchün rusiyedin uran import qilishni azaytish ramka kélishimi imzalidi.
türkiye awazi radiyosi xewiri: amérika soda ministirliqi bayanat bérip, rusiyedin uran import qilishqa munasiwetlik tökme qilip sétishqa qarshi turush tekshürüshini waqtinche toxtitish toghrisidiki 1992- yili imzalanghan kélishimge tüzitish kirgüzüsh üchün layihe teyyarlanghanliqini uqturdi.
ministirliqning rosatom bilen tüzitish kirgüzüsh ramka kélishimi imzalighanliqigha isharet qilinghan bayanatta, eger bu tüzitish yolgha qoyulsa, kélishimning mudditining 2040-yilghiche uzartilidighanliqi we bu jeryanda amérikaning rusiye uranigha tayinishchanliqining töwenleydighanliqi qeyt qilindi.
amérika soda ishliri ministiri wilbur ros, özgertish emelge éship qalsa, amérikaning yadro énérgiye sanaitining qoghdilip qalidighanliqini éytti.
mezkur tüzitish kirgüzüsh layiheside, rusiyedin import qilinidighan uranning miqdarining hazirqi kélishimde körsitilgen %20 din kelgüsi 2 yilda ottura hésab bilen %17 ge, 2028- yili %15 ge töwenlitilidighanliqi otturigha qoyuldi.
amérika soda ministirliqi, tüzitish layihesige munasiwetlik pikir - tekliplerning 28- séntebirgiche qobul qilinidighanliqini, tüzitish kirgüzüshning 5- öktebirgiche tamamlinidighanliqini uqturdi.
