gérmaniye: rusiyening waksinisi yéterlik derijide sinaqtin ötküzülmidi
gérmaniye, rusiyening wuxen wirusi (kowid – 19) waksinisining yéterlik derijide sinaq qilinmighanliqini, milyardlarche kishini bek baldur waksinilashning xeterlik ikenlikini bildürdi.
türkiye awazi radiyosi xewiri: rusiye prézidénti wiladimir putin, gamaléya instituti teripidin ishlepchiqirilghan, rusiyening tunji kowid – 19 waksinisining sehiye ministirliqining maqulluqidin ötkenlikini élan qilghanidi we bu kowid – 19 waksinisi resmiy testiqtin ötken tunji dölet bolghanidi.
moskwaning axirqi sinaqlar tamamlanmastinla waksinini testiqlishi bezi mutexesisislerde endishe peyda qildi؛ gérmaniye sehiye ministiri yéns span, «milyonlarche insanni, hetta milyardlarche insanni bek baldur waksinilashqa bashlash xeterlik bolushi mumkin. rusiyede bolup ötken ishlardin bekla gumanlinimen. asasliq mesile, ruslarning bizge bek köp bir nerse démesliki. bu yéterlik derijide sinaq qilinmidi» dédi.
span, yuqum jeryanidimu sinaqlarni qilip, netijisini xelq bilen ortaqlishishning ishench muhiti yaritish nuqtisidin intayin muhim ikenlikini éytti.
dunya sehiye teshkilati teripidin élan qilinghan bayanatta, «rus sehiye emeldarliri bilen alaqilishiwatimiz. waksinining dunya sehiye teshkilatining asasliq ölchemlirini orundighan bolushi kérekliki toghrisidiki alaqe dawam qiliwatidu. deslepki qedemdiki layaqetlik bolush ölchimi, waksinining barliq bixeterlik we ünüm netijilirining estayidil tekshürülüshini öz ichige alidu» dégen ibarilerge orun bérildi.
