amérika xitayning ijtimaiy taratqu eplirini chekleshke teyyarlanmaqta
amérika tashqi ishlar ministiri mayk pompéyo, «tik tok» qatarliq xitay merkezlik ijtimaiy taratqu eplirini chekleshni pilanlawatqanliqlirini uqturdi.
türkiye awazi radiyosi xewiri: mayk pompéyo «foks xewerler» qanilining soallirigha jawab bérish jeryanida amérika qoshma ishtatlirida ishlitiliwatqan xitay merkezlik ijtimaiy taratqu epliri heqqidimu pikir bayan qildi.
u, bolupmu «tik tok» epining éghir xewpsizlik tehditi peyda qilghanliqi toghrisidiki detalashlargha isharet qilip, amérikaning mesilige estayidil qarighanliqini tekitlidi.
«tik tok»ning cheklinip – cheklenmeydighanliqi toghrisidiki bir soalgha jawab bergen pompéyo, «bu mesilide pirézidént (donald tramp)ning aldigha ötüwélishni xalimaymen, biraq amérika qoshma ishtatliri, insanlarning téléfonlirigha chüshürülgen xitay menbelik eplerge qarita toghra shekilde muamile qilidu. nöwette bu mesilige köngül bölüwatimiz» dédi.
yene bir tereptin «tik tok» bu heqte yazma bayanat élan qilip, mayk pompéyoning sözlirige naraziliq bildürdi؛ shirketning amérikaliq xojayin teripidin bashquruluwatqanliqi we oxshash türdiki epler arisida «bixeterlik we ammiwi siyaset jehette aldinqi qatardin orun alidighanliqi» tekitlengen bayanatta, «ishletküchilirimizni bixeter ep bilen teminleshtinmu muhim bir ishimiz yoq. héchbir waqit xitay hökümitini uchur bilen teminlimiduq, telep qilinghan teqdirdimu bundaq qilmaymiz» dégen ibarilerge orun bérildi.
dunya miqyasida ayliq 800 milyon ishletküchige ige «tik tok»ning, ishletküchilirining xususiy uchurlirini xitay dairilirige melum qilidighanliqi ilgiri sürülmekte.
amérikaliq nurghun mutexessisler, shirketning amérika qoshma ishtatlirining dölet xewpsizlikige xewp élip kéliwatqanliqi heqqide pikir bayan qilmaqta.
