serraj xelqara jinayi ishlar mehkimisidin liwiyege tekshürüsh heyiti ewetishni telep qildi

türkiye awazi radiyosi xewiri: liwiye bash ministiri fayiz serraj, xelqara jinayi ishlar sot mehkimisidin, liwiyening sherqidiki qanunsiz qoralliq küchlerning lidéri xelife hafterge qarashliq qoralliqlar sadir qilghan jinayetlerni tekshürüsh üchün derhal heyet ewetishni telep qildi.

liwiye tashqi ishlar ministirliqi bayanatchisi muhemmed qeblawining tiwittér adrésida élan qilghan bayanatigha qarighanda, serraj, xelqara jinayi ishlar sot mehkimisini hafter qoralliqliri sadir qilghan jinayetlerni tekshürüsh üchün heyet ewetishke chaqirghan.

ewetilidighan heyetke herjehettin yardemchi bolidighanliqini bildürgen serraj, sadir qilinghan jinayetlerning jazasiz qélishining hafter qoralliqlirigha ruanda we bosniye- gértségowinadiki qirghinchiliq shundaqla natsistlar sadir qilghan jinayetlerdin buyanqi misli körülmigen jinayetlerni sadir qilishigha ilham bergenlikini eskertken.

bayanatqa qarighanda, serraj, hafter qoralliqlirining puqralargha, puqrawi ayrodurumlargha, köchmenler turuwatqan panahlinish orunlirigha hujum qilghanliqini we parlamént ezasi siham serghiwaning binghazidiki öyidin görüge élip qéchilishini urush jinayiti we we insaniyetke qarshi sadir qilinghan jinayet dep baha bergen.

hafter küchliri iyul éyidin buyan parlamént ezasi serghiwani namelum bir yerde tutup turmaqta.

xelqara jinayi ishlar sot mehkimisi bash teptishi fato bénsuda, 22 – iyunda liwiyedin tépilghan kolléktip mazalarning «urush jinayiti» yaki «insaniyetke qarshi sadir qilinghan jinayetler» ge pakit bolush éhtimali barliqini bildürgenidi.

b d t liwiyege yardem bérish idarisi 24 – iyunda yazma bayanat élan qilip, liwiyediki weqelerni tekshürüsh üchün b d t kishilik hoquq kéngishi qarmiqida liwiye xelqara tekshürüsh komitétining qurulghanliqini uqturghanidi.