afriqa qiteside jénidin ayrilghanlar 2 yérim mingdin ashti

türkiye awazi radiyosi xewiri: afriqa késelliklerni kontrol qilish we aldini élish merkizining yéngi melumatlirigha asaslanghanda, afriqa qiteside wuxen wirusi sewebidin jénidin ayrilghanlar 70 kishi köpiyip 2 ming 834 ke, yuqumlanghanlar sani bolsa yéqinqi 24 saette 3 ming 500 din éship 88 ming 172 ge yetken. hazirghiche 33 ming 863 kishining salametliki yaxshilanghan.

gherbiy afriqagha jaylashqan nigériyede 192 kishi wuxen wirusi sewebidin jénidin ayrildi, yuqumlanghan kishiler 6 mingdin ashti.

sudanda wuxen wirusi sewebidin 111 kishi jénidin ayrildi, 2 ming 728 kishi yuqumlandi.

wuxen wirusi sewebidin jénidin ayrilghanlar sani 26 ge, yuqumlanghanlar sani 954 ke chiqqan liwanda, wirusqa qarshi yolgha qoyulghan tedbirler 2020-yili 7-iyunghiche uzartildi.

liwan hökümiti 2020-yili 15-mart wabagha qarshi turush meqsitide yolgha qoyulghan seperwerlik ramkisida, qatnash we yémek-ichmek qatarliq kündilik éhtiyajni teminleydighan shirketlerdin bashqa barliq xususiy we dölet idare-organlirini taqashni qarar qilghan idi.

wuxen wirusi sewebidin 278 kishi jénidin ayrilghan, 16 ming 659 kishi yuqumlanghan isirailiyede, bash ministir nétanyahu, mart éyining axiriliridin bashlap taqilishqa bashlighan barliq ibadet jaylirining bügün (20-may) din tartip qaytidin échilidighanliqini bildürdi.

jenubiy koréyede yéqinqi 24 saette 32 kishining wuxen wirusi bilen yuqumlanghanliqining bayqilishi bilen, bu san 11 ming 110 gha chiqti. bu, jenubiy koréyede 11-maydin buyan körülgen eng yuqiri yuqumlinish bolup qaldi.

jenubiy koréyede bir qanche aydin buyan taqilip turuwatqan mektepler qedemmu qedem qaytidin échilishqa bashlidi.

rusiyede wuxen wirusi sewebidin jénidin ayrilghanlar 2 ming 972 ge, yuqumlanghanlar sani 308 ming 705 ke chiqti.

fédératsiye sayahet agéntliqining bashliqi zarina doguzowa (Zarina Doguzova) sayahet sahesidiki bezi cheklimilerning 1-iyundin bashlap emeldin qaldurushqa bashlinidighanliqini bildürdi.

wuxen wirusi sewebidin 3 ming 303 kishi jénidin ayrilghan hindistanda, yéqinqi 24 saette 5 ming 611 kishi yuqumlandi we buning bilen omumiy yuqumlanghanlar sani 106 ming 750 ke chiqti. bu, hindistanda wirus bayqalghan 2020-yili 30-yanwardin buyan bayqalghan eng yuqiri künlük yuqumlinish» bolup qaldi.