missuri ishtati xitay üstidin erz qildi
dunyada wuxen wirusi(Kovid-19) sewebidin jénidin ayrilghanlar 177 ming 708 ge yetti. yuqumlanghanlar 2 milyon 560 ming 63 tin, salametliki yaxshilanghanlar 700 mingdin ashti.
türkiye awazi radiyosi xewiridi: wabaning merkizige aylanghan amérikada, wuxen wirusi sewebidin jénidin ayrilghanlar 44 mingdin, yuqumlanghanlar 800 mingdin ashti. séstiralar aqsaray aldida qoghdinish eslihelirining kemchillikige naraziliq bildürüp namayish qildi.
wabagha qarshi küresh qiliwatqan saqliq saqlash xizmetchilirige wekillik qilidighan niyu york ishtatining séstiralar birleshmisi bolsa, ezalirining wirusqa qarshi yéterlik qoghdinish matériyalliri bolmighan ehwalda tashlap qoyulghanliqini ilgiri sürüp, ishtatliq hökümet we ikki doxturxana üstidin erz qildi.
amérika kéngesh palatasi wabagha qarshi küresh dairiside, kichik shirketler we saqliq saqlash merkezlirini qollash we téximu köp salametlik tekshürüsh meqsitide sunulghan 484 milyard dollarliq qoshumche xamchot layihesini qobul qildi.
missuri ishtati wuxen wirusi toghrisida dunyagha yalghan sözlesh bilen eyibliniwatqan xitay hökümiti üstidin erz qildi.
pirézidént tramp xarward uniwérstétidin waba yardimi ramkisida alghan texminen 9 milyon dollarni qayturushni telep qildi. pirézidént tramp bu heqte: «qayturush bérishke mejbur. chünki u pul ishchilar üchün idi, dunyadiki eng bay maarip organliridin biri üchün emes idi» dédi.
amérikada wuxen wirusi sewebidin körülgen tunji ölümler élan qilinghan 2020-yili 29-féwraldin bir qanche hepte burunla wirus bilen jénidin ayrilghanlarning barliqi ashkarilandi. kaliforniye ishtatigha qarashliq santa klara (Santa Clara) rayoni mesulliri kaliforniyede 6- we 17-féwralda ikki kishining öyliride wuxen wirusi sewebidin jéndin ayrilghanliqini élan qildi.
