wuxen wirusi natoghimu éghir zerbe berdi
xitayning wuxen shehiride otturigha chiqqan wuxen wirusi (Kovid-19) dunyada iqtisadiy we ijtimaiy tesirlerni peyda qilipla qalmastin, gherb dunyasining eng muhim herbiy ittipaqi natoghimu tesir qildi.
türkiye awazi radiyosi xewiri: 30-mart bélgiye paytexti biryusséldiki nato ishtabida xizmet qilidighan bir kishide wuxen wirusining bayqilishi bilen, natoda yuqumlanghan xizmetchiler sanning beshke chiqqanliqi bildürüldi. toluq san élan qilinmighan bolsimu, dunyaning oxshimighan jayliridiki nato nuqtilirida wezipe ötewatqan herbiy xadimlar arisida wuxen wirusi bilen yuqumlanghanlarning barliqi eskertildi.
nato ishtablirida xizmetchiler sani we yighin azaytildi. zörür bolmighan ehwalda xizmet munasiwiti bilen bashqa döletlerge bérish emeldin qalduruldi. sirttin ziyaretchi qobul qilishmu cheklendi. bir yilda ikki qétim ötküzülidighan «nato tashqi ishlar ministirliri yighini» tunji qétim intérnét arqiliq échildi.
nato tashqi ishlar ministirliri ete (2020-yili 2-aprél) bixeter tor lényeside téléwiziye yighini usulida, ittipaqqa munasiwetlik xewpsizlik mesililirini muzakire qilidu.
nato bash katipi stolténbérg wirus tarqilishqa bashlighandin kéyin, aldin ehmiyet béridighan ishning, xizmetchi xadimlar we herbiy qisimlarning salametliki hemde bixeterlikini kapaletke ige qilish bolghanliqini qeyt qildi.
u nato herbiy qisimliri we ishtablirining wuxen wirusining éghir tesirige uchrighanliqini eskertip, natogha oxshash muhim teshkilatning paaliyetlirini pütünley toxtitishning mumkin emeslikini bildürdi.
biraq, wuxen wirusining tarqilish süritining tézlishishi bilen, natoning teyyarliq sewiyesini yuqiri sewiyede tutup turushni we herbiy iqtidarini tereqqiy qildurushni meqset qilghan manéwirlar emeldin qalduruldi, kéchiktürüldi yaki töwen nisbette qatnishish emelge ashuruldi.
amérikaning kirizis waqtida yawropagha esker we herbiy eslihe yetküzüshni meqset qilghan «Defender-Europe 20» manéwiri, wuxen wirusining tesirige uchrighan birinchi manéwir boldi.
amérika yawropagha esker yötkeshning toxtitilidighanliqini we manéwirning bir qismining emeldin qaldurulidighanliqini élan qildi.
norwégiyede 2020-yili 9-mart bashlanghan «Exercise Cold Response 20» manéwirimu toxtitildi. «Dynamic Front», «Saber Strike» we «Swift Response» manéwirliri emeldin qalduruldi.
