amérikining y p g / p k k gha bergen qorallirining tizimlikini turghuzmighanliqi ashkarilandi

türkiye awazi radiyosi xewiri: péntagon maliye ishliri ishxanisining tekshürüshi netijiside, amérika alahide qisimliri birleshme wezipe ötesh etritining, terbiyele – qorallandur fondi dairiside süriyege bergen qorallarning tizimlikini turghuzmighanliqini éniqlap chiqti.

tekshürüsh doklatida, «alahide qisimlar birleshme wezipe ötesh etritining 2017 we 2018 – yilliq xamchotliridin ajritilghan 715 milyon dollarliq eslihening tizimlikini tutmighanliqi éniqlandi» dégen ibarilerge orun bérildi.

amérika armiyesining köpligen jaylarda qoral zapaslighanliqi we zapaslash xizmetlirige bir qatar orunlarning arilashqanliqi eskertilgen doklatta, süriyede tarqitilish meqsitide ewetilgen qorallarning tizimlikining retlik turghuzulmighanliqi alahide tekitlendi.

doklatta yene, kuweyttiki iskilatlarda ölchemlik we sistémiliq zapaslanmighanliqi üchün qorallarning bir qismining datliship  ishletkili bolmaydighan halgha chüshüp qalghanliqi qeyt qilindi.

doklatta, yoqap ketken qorallarning süriyede amérikaning kontrolluqining sirtidiki bashqa guruppilarning qoligha ötüp ketken – ketmigenlikige dair tepsilatlargha orun bérilmigen bolsimu, 2017 we 2018 – yilliq xamchottin süriye üchün jemiy 930 milyon yardem telep qilinghanliqigha isharet qilindi.

péntagon, y p g / p k k gha bérilgen barliq qorallarning tizimlikining bir tutash nomurliri bilen birlikte türkiyege bérilgenlikini ilgiri sürmekte.

amérika rehberliki, 2020 – yilliq xamchotidin y p g / p k k ni merkez qilghan halda süriyediki özi qollap kéliwatqan guruppilargha 300 milyon dollar ajratqan, buning 200 milyon dollirigha qoral we herbiy lazimetlikler sétiwélinghanidi.

péntagonning yéngi élan qilinghan 2021 – yilliq xamchot pilanida bolsa, süriyediki özi qollawatqan guruppilargha 200 milyon dollarliq qoral we eslihe bérilishi nishan qilinmaqta iken.