xewpsizlik kéngishi süriye hakimiyitini türkiye eskerlirige hujum qilishni toxtitishqa chaqirdi

türkiye awazi radiyosi xewiri: amérikaning b d t da turushluq daimiy wekili kélly kraft b d t xewpsizlik kéngishide söz qilip, süriyede balilar soghuqtin ölüwatqan mushundaq bir peytte süriye hakimiyitining qollighuchiliri rusiye, iran we hizbullahning hujumlirida herbiy zeper quchqanliqini élan qilghanliqini éytti we sözini dawamlashturup, «amérika bolush süpitimiz bilen, süriyelik musapirlargha  yardem qilish jehette éghir yükni yelkisige alghan nato ittipaqdishimiz - türkiyening qanunluq menpeetlirini qollaymiz we türkiyening toqunushlar tüpeyli otturigha chiqidighan yéngi bir musapirlar éqinigha duch kélish qayghulirini chüshinimiz. türkiyeni süriyening gherbiy shimalida jiddiychilikni ulghaytish bilen eyibligen rus emeldarlarning bayanatlirini qetiy ret qilimiz. buning jawabkarining esed hakimiyiti we rusiye ikenlikide qilche shübhe yoq» dégenlerni qeyt qildi.

kraft, amérikaning, urush toxtitishning qaytidin küchke ige qilinishi we hakimiyet küchlirining 2018 – yili sochida hasil qilinghan urush toxtitish kélishimining rohigha asasen, toqunush siziqining keynige chékinishini qolgha keltürüsh yolida türkiye bilen mas halette xizmet qilishni dawamlashturidighanliqini tekitlidi.

gérmaniyening b d t da turushluq daimiy wekili kristof xusgénmu türkiyening idlibtiki közitish nuqtiliri etrapida dawamlishiwatqan sürkilishtin endishe qiliwatqanliqlirini bildürüp, «süriye hakimiyitidin türkiye armiyesige qiliwatqan hujumlirini toxtitishini we derhal sürkilishni azaytishini telep qilimiz» dédi.

engliyening b d t da turushluq daimiy wekili karén bolsa, «türkiyege qiliniwatqan hujumlar toxtitishi kérek. türkiye idlib mesilisini tinch usulda hel qilish üchün küch chiqardi we sürkilishning ulghiyip kétishining nöwette 3 yérim milyon musapirning yükini kötürüwatqan türkiyege tesir körsitishidin endishe qiliwatimiz» dégenlerni qeyt qildi.