türk jumhuriyetlirimu wuxen wirusigha qarshi tedbirlerni aldi
rusiye we ottura asiya türk jumhuriyetliridin qazaqistan, qirghizistan,özbékstan,tajikstan qatarliq döletler, wuxen shehiride otturigha chiqqan yéngi tipliq koronaw wirusi(2019-nCoV)ning téz tarqilishi sewebidin bir qatar bixeterlik tedbirlirini yolgha qoydi.
türkiye awazi radiyosi xewiri: rusiye charwa-mal doxturluqi we ösümlük közitish idarisi (Rosselhoznadzor) xitayda tarqiliwatqan wuxen wirusining rusiyede körülmigenlikini élan qilghan bolsimu, emma puqralarning xitaygha barmasliqini tewsiye qildi.
rusiye ayrodurumlirida wuxen wirusigha qarshi tedbirler élinishqa bashlidi.
qazaqistanda ayrodurumlar we chégra éghizlirida karantin qilish xizmetliri kücheytildi. yéqinqi künlerde xitaydin qazaqistangha kelgen 13 ming yoluchi béketlerde kaméralar arqiliq tekshürüldi.
hazirche wuxen wirusi körülmigenlikini bildürgen qazaqistan mesulliri, xitaygha barmaqchi bolghanlarni ziyaritini kéchiktürüshke chaqirdi. sayahet qiliwatqanlardin bolsa, salametlikige diqqet qilishni telep qildi.
qirghizistan dairiliri wuxen wirusigha munasiwetlik weqeler köp yüz bergen rayonlargha sayahetke barmasliqni, süt, gösh we déngiz mehsulatliridin yiraq turushni, taziliqqa diqqet qilishni tewsiye qildi.
özbékstan ayrodurumliridimu xitaydin kelgen yoluchilarni kaméralar arqiliq tekshürüsh bashlandi. wirus tetqiqat merkezliride her éhtimalgha qarshi bémarlar üchün ayrim dawalash öyi ajritildi. tejribixanilar qan tekshürüsh üchün teyyar halgha keltürüldi.
tajikstan somor hawa yolliri shirkiti xitay seperlirini emeldin qaldurdi. xitayning jenubiy hawa yolliri shirkitining tajikstan seperliri toxtitildi.
tajikstan sehiye ministirliqi weziyet muqimlashqiche tajikstan puqraliridin xitay sayahitini kéchiktürüshni telep qildi we xitaydin kelgen yoluchilarning tekshürülidighanliqini bildürdi.
