xelqaraliq jemiyetler misirgha naraziliq bildürdi

türkiye awazi radiyosi xewiri: dujarik kündilik axbarat élan qilish yighinida, misir saqchilirining anadolu agéntliqining qahirediki ishxanisigha bésip kirip, töt xizmetchini tutup ketkenliki üstide toxtaldi.

u: «her daim muxbirlarni tutush we qolgha élish xewerliridin endishe hés qilimiz. weqeni sürüshte qilimiz» dédi.

amérika tashqi ishlar ministirliqimu bu heqte bayanat élan qilip: «misir hökümitini tutup kétilgen anadolu muxbirlirini qoyup bérishke, erkin we ochuq médyagha ruxset bérishke chaqirimiz» dédi.

muxbirlarni qoghdash komitéti,(CPJ)  misirda tutup kétilgen anadolu muxbirlirining derhal qoyup bérilishini chaqiriq qildi.

muxbirlarni qoghdash komitéti ottura sherq we shimaliy afriqa kordinatori shérif mensur bu heqtiki bayanatida: «misirda xizmet qilidighan muxbirlar döletler otturisidiki siyasiy hésab-kitablar üchün paydilinip kétish qorqunchi astida ishleshke mejbur bolmasliqi kérek. misir dairiliri tutup kétilgen anadolu muxbirlirini derhal qoyup bérishi kérek. médyaning awazini öchürüsh we tosqunluq qilish üchün, asassiz xewerlerni axirlashturush kérek» dédi.

u muxbirlarni qoghdash komitétining misir teptish idarisi bilen anadolu muxbirlirining tutup kétilgenlikini sürüshte qilip alaqilashqanliqini, biraq misir dairiliridin hazirghiche jawab kelmigenlikini bildürdi.

xelqara axbarat instituti qanun bölümining mudiri rawi r.prasada (Ravi R. Prasad) anadolu muxbirlirining tutulghanliqigha qattiq naraziliq bildürüp: «anadolu muxbirlirigha qilinghan hujumni qattiq eyibleymiz. qahire hökümiti töt muxbirni derhal qoyup bérishi we néme üchün tutulghanliqigha chüshenche bérishi kérek» dédi.

balqan rayoni we sherqiy jenubiy yawropa xewer agéntliqliri birleshmisi (ABNA-SE) mezkur weqege naraziliq bildürdi we bundaq heriketlerning médya erkinlikige ziyan salidighanliqini bildürdi.