pompéyo: bu qétimqi hawa bombardimani irangha bérilgen keskin jawab
amérika tashqi ishlar ministiri mayk pompéyo iraqtiki birleshme qisim herbiy bazisigha qilinghan hujumdin kéyin élip bérilghan amérika hawa herikitining, irangha bérilgen keskin jawab ikenlikini bildürdi.
türkiye awazi radiyosi xewiri: amérika tashqi ishlar ministiri mayk pompéyo irangha yéqinliqi bilen tonulghan kétaib hizbullah teshkilatining kerküktiki birleshme qisimning herbiy bazisigha qilinghan hujumi we arqidin amérika ayropilanlirining hawa bombardimani toghrisida toxtaldi.
u: «bügün (29-dékabir) iraqta basqan qedimimiz, pirézidént tramp bir qanche aydin buyan tekitlep kelgendek, iran amérika eskerlirining hayatigha xewp yetküzgen ehwalda keskin jawab béridighan qetiy iradimizni körsitip béridu» dédi.
u buninggha oxshaydighan ehwallar qayta yüz bergen ehwalda, herbiy jehettin jawab bérishtin yanmaydighanliqlirini eskertip, amérikaning rayondiki menpeetliri üchün qoshumche tedbirlerni yolgha qoyush mumkinlikini qeyt qildi.
amérika dölet mudapie ministiri éspér (Esper) kétaib hizbullah teshkilatining hujumigha jawaben, ularning besh dane herbiy nuqtisining muweppeqiyetlik halda bitchit qilinghanliqini bildürüp: «pirézidént tramp bilen iranning qollishi astidiki yaman niyetlik teshkilatlargha qarshi özimizni qoghdash üchün, qolimizdiki bashqa tallash yollirini muzakire qilduq» dédi.
kétaib hizbullah teshkilati iraqning kerkük rayonidiki birleshme qisimning bir herbiy bazisigha hujum qilghan bolup, étilghan 30 din artuq rakétamiyot oqi netijiside, bir amérika eskiri jénidin ayrilip, ikki iraq eskiri we ikki amérika eskiri yarilanghan idi. amérika dölet mudapie ministirliqi buninggha jawaben, kétaib hizbullah teshkilatining iraq bilen süriyediki besh herbiy nuqtisining bombardiman qilinghanliqini élan qilghan idi.
