awstiraliyede türk diplomatlarning shéhit qilinishigha alaqidar délo qayta échildi
awstiraliyede türk diplomatlarning qatili heqqide pip uchi bilen teminligüchilerge bérilidighan mukapat 1 milyon dollargha chiqirildi.
türkiye awazi radiyosi xewiri: türkiye awstiraliyening sidnéy shehiride 1980 – yili 17 – dékabirda «JCAG» ezasi ermen térrorchilar teripidin shéhit qilinghan türkiye konsuli sharik ariyak we bixeterlik wakaletxanisi bashliqi engin sewer délosining qaytidin échilghanliqini memnunluq bilen qarshi aldi.
türkiye tashqi ishlar ministirliqidin élan qilinghan yazma bayanatta, «ASALA», «JCAG» we «ARA» namliq ermen térrorluq teshkilatilirining hujumliri sewebidin 1973 – yilidin buyan 31 neper diplomatiye xadimi we aile ezalirini qoshqanda jemiy 58 neper türkiye puqrasining qurban bolghanliqi tekitlendi.
chet elliklerni qoshqanda, bu hujumlarda ölgenler sani 77 kishi bolup, bayanatta yene mundaq déyildi:
«bu hujumlar tüpeylidin yüzligen kishi yaridar boldi. hujumlar yüz bergen gherb döletliridiki tekshürüshlerning asasliq köp qismi netijisiz qaldi. délolar jinayetchisining üsti éniqsiz shekilde yépiwétildi. eziz shéhitlirimizning 39 – xatire yilida jinayetchilerning qolgha élinishi üchün awstiraliyede tunji qétim bu térrorluq hujumigha alaqidar melumat bergenlerge 1 milyon dollar mukapat bérilidighanliqi jakarlandi. bu qarar kéchikken teqdirdimu adaletning emelge éshishigha bolghan ümidni yashnatti. shéhit yiqinlirining dert – elemlirige azraq bolsimu teselli bolghusi»
bayanatta, shéht qilinghan diplomatlarning déloliri yépiwétilgen bashqa döletlerningmu qisqa waqit ichide awstiraliyedikige oxshash qedemlerni tashlishining arzu qilinidighanliqi qeyt qilindi.
jenubiy gallér ölkisi saqchi idarisining muawin mudiri mark walton shéhit diplomatlarning qatillirini tutush üchün térrorluqqa qarshi küresh bashqarmisida alahide bir etret qurulghanliqini élan qilghan idi.
mark walton tekshürüshning sidnéydiki térrorluqqa qarshi küresh etriti bilen birlikte qaytidin bashlinidighanliqini bildürüp, türk diplomatlarning qatili heqqide pip uchi bilen teminligüchilerge bérilidighan mukapatning eslidiki 250 ming awstiraliye dolliridin 1 milyon awstiraliye dollirigha (texminen 4 milyon türkiye lirasi) chiqirilghanliqini éytqan idi.
