awstiraliye saqchiliri türk diplomatlarni öltürgen térrorchilarning péyide
awstiraliyening sidnéy shehiride shéhit qilinghan türk diplomatlarning qatilliri jiddi sürüshte qilinmaqta.
türkiye awazi radiyosi xewiri: awstiraliyening sidnéy shehiride 1980 – yili 17 - dékabirda ermeniy térrorchilar teripidin shéhit qilinghan türkiyening sidnéyda turushluq bash konsoli sharik ariyak we bixeterlik wekaletxanisi bashliqi engin sewerning qatili yaki qatillirining qolgha chüshüshige yaraydighan melumat yetküzgenlerge 1 milyon awstiraliye dolliri mukapat bérilidighan boldi.
sharik ariyak we engin sewerning xizmet üstide shéhit qilinishining 39 – xatire yilida, mezkur hujum yüz bergen türkiyening sidnéy konsolxanisi aldida xatirilesh murasimi ötküzüldi.
murasimgha jenubiy gallér ölke waliysining bash meslihetchisi michel millér, talant -iqtidarni tereqqi qildurush we tuluq ottura maaripi ministiri jéf lé, ölkilik qanun komitéti muawin bashliqi shundaqla türk dosluq guruppisi bashliqi tréwor xan, merkeziy öktichiler dairisidiki ishchilar partiyesidin istémalchilarning heq – hoquqini qoghdash ishliri ministiri juliya fin, türkiyening kanbérrada turushluq bash elchisi korxan karakoch, sidnéy bash konsoli melih karalar, shéhit ariyakning qizi chaghla ariyak, saqchi idarisi muawin mudiri mark walton we nurghun sanda diplomatlar hemde türkler qatnashti.
xatirilesh murasimidiki nutuqlarda ariyak we sewer shéhit qilinghan hujumning awstiraliye tewelikide yüz bergen tunji térroluq hujumi ikenliki eskertildi. awstiraliyening köp kültürlük qurulmisida bu xil weqelerge qetiy orun yoqluqi tekitlendi.
saqchi idarisi muawin mudiri mark walton murasimdin kéyin chaqirghan axbarat élan qilish yighinida, shéhit qilinghan diplomatiye xadimlirining qatillirini tutush üchün saqchi idarisigha qarashliq térrorluqqa qarshi küresh bölimi dairiside alahide bir etretning qurulghanliqini élan qildi.
mark walton: «melumat yetküzgenlerge bérilidighan mukapat 250 ming dollardin 1 milyon dollargha chiqirildi. suyiqestning pilanlinishi we hujumning yüz bérishi heqqide melumati bolghan hemde bu jinayetlerni sadir qilghan motsiklittiki jinayetchilerning kimlikini bildighan kishilerning barliqidin shübhilenmektimiz» dédi.
