amérika paris qoltuqigha qoshun ewetidu
amérika qoshma ishtatliri dölet mudapie ministiri mark éspér seudi erebistan bilen ereb birleshme xelipilikining telipige binaen paris qoltuqining hawa mudapiesi üchün qoshun ewetidighanliqlirini jakarlidi.
türkiye awazi radiyosi xewiri: éspér, aqsarayda seudi erebistanning aramko shirkitining néfit muesseselirige qilinghan hujum mesilisi toghruluq ötküzülgen bixeterlik yighinidin kéyin, amérika qoshma ishtatliri bash ishtab bashliqi général juzéf dunford bilen birlikte ötküzgen qoshma axbarat élan qilish yighinida qilghan sözide, barliq delil - ispatlarning aramko shirkitining néfit muesseselirige qilinghan hujumning jawabkarining iran ikenlikini körsitidighanliqini eskertish bilen bir waqitta, xelqara jemiyetning xelqaraliq ehdinamiler we qanun – belgilimilerni qoghdash mesuliyiti barliqini tekitlidi.
u , seudi erebistan bilen ereb birleshme xelipilikining özlirining muhim ul eslihe qurulushlirini qoghdishi üchün xelqaraliq yardem telep qilghanliqini, bu meqsette pirézidént trampning rayongha qoshun ewetish qararnamisini testiqlighanliqini qeyt qildi.
amérika qoshma ishtatliri bash ishtab bashliqi général juzéf dunford bolsa, paris qoltuqigha ewetildighan qoshunning paris qoltuqini mudapie qilish xizmiti öteydighanliqini eskertti.
seudi erebistanning milliy néfit shirkiti aramkogha ait ikki muessesening ötken shenbe küni kéchisi shu jay waqti saet 4 te qoralliq uchquchisiz hawa apparatining hujumigha uchrighanliqi, hujum netijiside bu muesseselerde ot apiti yüz bergenliki bildürülgenidi. yemendiki iran qollawatqan husiylar, adem ölüsh we yarilinish ehwali körülmigen bu hujumlarni 10 dane qoralliq uchquchisiz hawa apparati arqiliq élip barghanliqlirini ilgiri sürgenidi.
