wénézuélada guaydo bashchiliqidiki öktichiler söhbettin chékindi
wénézuélada öktichi rehber xuen guaydo bashchiliqidiki öktichiler hökümet bilen ötküzülüwatqan uchrishishlardin chékingenlikini élan qildi. biraq, dölet parlaméntidiki bezi öktichi partiyeler hökümet bilen yéngi kélishim hasil qildi.
türkiye awazi radiyosi xewiri: öktichiler köp sanliqni igileydighan dölet parlaméntidiki «wénézuéla üchün chariler» we «özgertish we ilgirilesh» partiyeliri, nikolas maduro hökümiti bilen kélishim hasil qildi. kélishim paytext karakastiki tashqi ishlar ministirliqida imzalandi.
terepler otturisida yene, izchil muzakire ötküzüsh üchün dölet diyalog üstili tesis qilish mesilisi üstidimu kélishim hasil qilindi.
özini waqitliq pirézidént dep élan qilghan amérikaning qollishigha érishken xuen guaydoning naraziliqini qozghighan kélishim, dölet saylam kéngishige yéngi ezalarning teyinlinishi, wénézuéla igilik hoquqi barliqini ilgiri sürüwatqan ésikibo (Esequibo) rayonidiki heq-hoquqlarni qoghdash, bezi sotqa tartilghanlarning qoyup bérilishi we néfit mehsulatlirini yémek-ichmekke almashturup sétish qatarliq maddilarni öz ichige alidu.
wénézuélagha yürgüzülgen xelqaraliq émbargolarni emeldin qaldurush telep qilinghan kélishimde, hakimiyet béshidiki birleshme sotsiyalist partiyening parlaméntqa qaytishi qarar qilindi.
wénézuéla uchur-alaqe, medeniyet we sayahet ishlirigha mesul muawin pirézidént xorxé rodrigéz (Jorge Rodriguez), mezkur kélishimning wénézuéladiki tinchliqni kücheytish üchün tashlanghan chong qedem ikenlikini tekitlidi we barliq öktichi partiyelerni dölet diyalog üstili etrapigha toplinishqa chaqirdi.
