rusiye amérika bilen talibanning tinchliq söhbetliri toghrisida ipade bildürdi
rusiyening b d t da turushluq daimiy wekili wassiliy nébénzia, amérika qoshma ishtatliri bilen taliban otturisidiki tinchliq söhbetliri heqqide toxtaldi.
türkiye awazi radiyosi xewiri: rusiyening b d t da turushluq daimiy wekili wassiliy nébénzia, amérika qoshma ishtatliri bilen taliban otturisidiki tinchliq söhbetliri heqqide toxtilip, «afghanistanning bashlamchiliqida tinchliq ornitilishini xalaymiz. bir kélishim hasil qilinsa qollaymiz» dédi.
b d t xewpsizlik kéngishining séntebir éyi nöwetchi bashliqliq wezipisini ötküzüwalghan rusiyening b d t da turushluq daimiy wekili wassiliy nébénzia muxbirlarni kütüwélish yighinida, amérika bilen afghanistan toghrisida kéngesh élip barghanliqlirini bildürdi.
afghanistanning bashqa döletlerdin kelgen térrorchilar éqinigha duch kéliwatqanliqini tilgha alghan nébénzia, «bizning afghanistangha alaqidar bir pilanimiz yoq. afghanistan bashlamchiliqida tinchliq ornitilishini xalaymiz. bir kélishim hasil qilinsa qollaymiz» dédi.
afghanistan pirézidénti eshref ghéni rehberlikidiki hökümetke nisbeten küchlük tehdit amili boluwatqan taliban teshkilati, hazirmu afghanistanning xéli köp jaylirida höküm sürmekte.
amérika bilen taliban arisidiki eng yéngi söhbetler, «afghanistan zéminlirining, bolupmu talibanning kontrolluqidiki jaylarning térrorluq teshkilatlirigha bixeter rayon bolup qalmasliqigha kapaletlik qilish bedilige amérika eskerlirining afghanistandin pütünley chékindürülüshi» ni ramka qilghan asasta élip bérilmaqta.
