pompéyo: xitay uyghurlarni basturush arqiliq xelqara qanunni depsende qiliwatidu
amérika qoshma ishtatliri tashqi ishlar ministiri mayk pompéyo xitayning uyghur türklirige qarshi basturush siyasetlirini yolgha qoyush arqiliq xelqara qanunni depsende qiliwatqanliqini bildürdi.
türkiye awazi radiyosi xewiri: ministir pompéyo uyghur aptonom rayonida yüz bériwatqan özgirishler toghruluq ammiwi ortaqlishish tor béti Twitter sehipiside élan qilghan bayanatida, xitayning uyghurlargha qaratqan ammiwi halda tutqun qilish siyasitini izchil dawamlashturuwatqanliqini tekitlep mundaq dédi: «uyghur aptonom rayonida uyghur türklirige qaritilghan ammiwi halda tutqun qilish we yoqitish weqeliri toghruluq dawamliq ishenchilik doklatlar kéliwatidu. xitayni yene bir qétim hem xelqara qanunni hem özining qanun – belgilimilirini depsende qilidighan bundaq basturush taktikilirini toxtitishqa chaqirimen.»
xelqara jamaetchilik xitayni yéqinqi yillarda uyghur türkliri yashawatqan uyghur aptonom rayonida «terbiyelesh merkezliri» namida astida paaliyet élip bériwatqan lagérliri arqiliq uyghurlarning kimliki we medeniyitini depsende qilish bilen tenqid qilmaqta.
birleshken döletler teshkilati kishilik hoquq kéngishige eza 22 dölet, 11 – iyul küni béyjinggha, xitayning uyghur aptonom rayonidiki uyghurlar we bashqa az sanliqlargha qaratqan muamilisini tenqid qilip, hemde xitayni ammiwi halda nazaret astigha élish weqelirini toxtitishqa chaqirip, mektup yollighanidi.
kishilik hoquqni közitish teshkilatining doklatida, yéqinqi ikki yil ichide uyghur aptonom rayonida köp sanda kishining «xewpning aldini élish tedbiri» nami astida bigunah halda tutqun qilinghanliqi, «siyasiy jehettin xeterlik» dep qaralghan shexslerning héchqandaq bir edliye organining qarari bolmastinla yighiwélish lagérlirigha ewetilgenliki eskertilgenidi.
