beshshar esed qisimliri xan sheyxun chégrasigha yéqinlashti

türkiye awazi radiyosi xewiri: yéqinqi bir heptidin buyan idlibning jenubidiki hama etrapida ilgiriligen beshshar esed küchliri, habit bazirini, sukeyk we téri égizliklirini, kefreydun we sabbaghiye déhqanchiliq meydanliri bilen xan sheyxun nahiyesining chégralidiki kirish nuqtiliridin biri bolghan fakirni qolgha kirgüzdi.

buning bilen, xan sheyxun nahiyesini gherb tereptin qorshashqa urunghan beshshar esed küchliri, nahiye chégrasigha 500 métir yéqinlashqan boldi.

iranning qollishi astidiki chet ellik térrorist guruppilar bilen rusiye alahide qisimliri we kiralanghan eskerlerning yardimige érishken beshshar esed küchliri, xan sheyxunning ichidin ötidighan heleb-demeshiq 5-m tashyolini késip tashlash aldida turmaqta.

xan sheyxun nahiyesi 2017-yili 4-aprél beshshar esed qismining ximiyelik hujumida 100 kishining ölüshi bilen dunya küntertipige kelgen idi. amérika 7-aprél beshshar esed hakimiyitining shayrat hawa armiye bazisini bombardiman qilghan idi. b d t bilen ximiyelik qorallarni cheklesh teshkilatining ortaq tekshürüsh komitéti 2017-yili 27-öktebir ximiyelik hujumning beshshar esed hakimiyiti teripidin qilinghanliqini toghrilighan idi.

türkiye, rusiye we iran 2017-yili 4-5-may küni qazaqistan paytexti astanada xan sheyxunni öz ichige alghan halda «idlib jiddiychilikni peseytish rayoni» élan qilghan idi. biraq, xan sheyxun izchil halda beshshar esed hakimiyiti we qollighuchilirining shiddetlik hujumlirigha uchrap kelmekte.

xan sheyxunning texminen 10 kilométir jenubigha jaylashqan morik nahiyesining sherqiy jenubida türkiye armiyesining bir közitish nuqtisi bar.

süriye qoralliq öktichiliri hujumlarning kölimi kéngeygen ehwalda moriktiki közitish nuqtisining qorshawgha élinish xetirige duch kélidighanliqini ilgiri sürmekte.