gérmaniye bash ministiri xongkong xelqining heq-hoquqining barliqini bildürdi

türkiye awazi radiyosi xewiri: gérmaniye bash ministiri angéla mérkél litwaniye pirézidénti gitanas nawséda (Gitanas Nauseda) bilen körüshkendin kéyin ötküzülgen qoshma axbarat élan qilish yighinida, xongkongda dawam qiliwatqan namayishlar üstide toxtaldi.

u: «zorawanliqlardin yiraq turush we diyalog ramkisida mesilini hel qilish imkaniyitige érishish üchün her qandaq ish qilinishi kérek» dédi.

u diyalogni qollaydighanliqlirini tekitlep, bu diyalogning xongkongda küchke ige bolghan qanunlar asasida emelge éshishi kéreklikini qeyt qildi.

u litwaniye pirézidénti gitanas nawséda bilen yawropa ittipaqi, engliyening yawropa ittipaqidin chékinishi, rusiye bilen bolghan munasiwetler qatarliq bir qatar mesililerni muzakire qilghanliqlirini bildürüp, yawropa ittipaqidin chékingendin kéyin, engliyening yawropa ittipaqi bilen yéqin hemkarliqlirini dawamlashturushi kéreklikini qeyt qildi.

u yawropa ittipaqining nöwetchi reislikini ötewatqan finlandiyede ötküzülidighan dölet mudapie ministirliri we tashqi ishlar ministirlirining gheyri resmiy yighinlirida, hurmuz boghuzida soda paraxotlirining bixeterliki mesilisining konkrét shekilde muzakire qilinidighanliqini, finlandiyening maslashturghuchi rol oynaydighanliqini bildürdi.

u amérika pirézidénti donald tramp bilen amérikaning bérlinda turushluq bash elchisi richard grénél (Richard Grenell) ning gérmaniyediki amérika eskerlirini polshagha orunlashturush toghrisda tehdit salghanliqi heqqidiki soalgha: «men amérika eskerliri gérmaniyede turuwatqan jaylarning nahayiti yaxshi jaylar ikenlikige ishinimen, u yerlerge köp meblegh sélindi» dédi.

u amérika eskerlirining gérmaniyege orunlashturulushining «yaxshi sewebliri» barliqini bildürüp, gérmaniyening ichki ishlepchiqirish omumiy qimmitining %2 ni mudapiege ishlitish nishanining barliqini we bu toghrida heriket qiliwatqanliqlirini qeyt qildi.

u: «gérmaniyening ehwaligha qarighanda, armiyede nurghun muhim yaxshilashlarni élip barduq. ochuqini éytqanda, buni özimizning menpeetimiz üchün qiliwatimiz. bu her qandaq yerdin kelgen buyruq emes. bu barak obamaning dewride chiqirilghan qarar, pirézidént trampning dewride emes» dédi.

üch heptilik dem élishtin qaytip kelgen mérkél üchün, burun körülgen salametlik ehwali közde tutulghan halda tedbir élindi. mérkél bilen gitanas nawséda körüshüshtin ilgiri ötküzülgen kütüwélish murasimida, ikki döletning dölet marshliri oqulghanda olturup anglidi.