yawropa ittipaqi amérikining qararigha qarshi ikenlikini bildürdi

türkiye awazi radiyosi xewiri: yawropa ittipaqi komitétining bayanat ishliri bashqarmisi teripidin bu heqte élan qilinghan bayanatta, amérika qoshma ishtatlirining  2003 – yildin buyan tunji qétim ölüm jazasigha höküm qilinghanlargha qarita jazasining ijra qilinishqa bashlinidighanliqini uqturushi heqqide mundaq déyildi: «bu qarar hem amérika qoshma ishtatlirining hem pütkül dunyaning ölüm jazasini bikar qilish mayilliqigha zittur. shuning bilen bir waqitta, ölüm jazasi yer shari xaraktérlik kishilik hoquq bayannamisighimu xilaptur. shunga yawropa ittipaqi ölüm jazasigha qattiq qarshi bolup, bu jazaning dunya miqyasida bikar qilinishini qolgha keltürüsh üchün dawamliq xizmet ishleydu.»

amérika qoshma ishtatliri edliye ministirliqi 2003 – yildin buyan tunji qétim ölüm jazasigha höküm qilinghanlargha qarita bu jazaning ijra qilinishqa bashlinidighanliqini uqturghanidi.

amérika qoshma ishtatliri edliye ministirliqi teripidin élan qilinghan we edliye ministiri wilyém barning yolyoruqi neqil keltürülgen yazma bayanatta, hazirmu ölüm jazasi bérilidiighanlar tizimlikide bar bolghan we bala öltürüsh jinayiti bilen eyiblengen 5 mehbusning tizimliki, fédératsiye jaza ijra qilish orginigha ewetilgen bolup, ulargha dékabirdin bashlap 6 hepte ichide ölüm jazasi bérilidighanliqi, tizimlikte 62 mehbusningmu ismi bar bolup, ularghimu dawamliq ölüm jazasi bérilidighanliqi bildürülgenidi.

bu heqtiki qararning, 2020 – yilqi pirézidént saylimi harpisida bolupmu zeher etkeschiliki guruhliri we adem öltürüsh jinayiti qilmishlirini sadir qilghan guruhlar üchün ölüm jazasi bérilishini telep qiliwatqan amérika qoshma ishtatliri pirézidénti donald tramp bilen démokratlar otturisidiki talash – tartishlarni téximu ewjige chiqiriwétishi kütülmekte.