awstiriyege ötüp kétishke urunuwatqan köchmenler ölüm girdabidin qutuldi
wingériyedin awstriyege bir minibusning üsti yépiq kuzupigha yoshurunup ötüp kétishke urunghan 16 köchmen hawa yétishmey ölüp kétishke azla qalghanda qutquzuwélindi.
türkiye awazi radiyosi xewiri: wingér xewer agéntliqining bildürüshiche, györ – moson – sopron rayonluq teptish mehkimisi bayanat bérip, yekshenbe küni 16 neper qanunsiz köchmenni minibusning yépiq kuzupigha sélip élip mangghan roméniyelik bir kishining adem etkeschiliki jinayiti bilen eyiblinip tutqun qilinghanliqini uqturghan.
bayanatta, gumandarning, 15 i afghanistan, biri iran puqrasi bolup jemiy 16 ademni wingériyening sherqiy qismidiki chégrada minibusigha sélip döletning gherbiy chégrasigha qarap yolgha chiqqanliqi, yolda musapirlarning aram élishigha purset bermigenliki eskertildi.
qanunsiz köchmenlerning seper jeryanida hawa yétishmigenliki üchün minibusning ishikini échishqa tirishqanliqi, mashinigha mushtlash arqiliq shopurni agahlandurghanliqi heqqidiki uchurlargha orun bérilgen bayanatta, minibusning awstriye chégrasidiki sopran rayonida saqchilar teripidin toxtitilip tekshürülgenliki qeyt qilindi.
bayanatta yene, adem etkeschisi dep qariliwatqan gumandar üstidin liyuksémburg teripidinmu tutush buyruqi chiqirilghanliqi toghrisidiki uchurlargha orun bérildi.
