xitay amérika bilen soda muzakirilirini qayta bashlaydighanliqini élan qildi

türkiye awazi radiyosi xewiri: xitay soda ministirliqi bayanatchisi gua fing paytext béyjingda chaqirghan axbarat élan qilish yighinida: «xitay we amérika heyetliri ikki dölet rehberlirining iyun éyida yaponiyening sahibxanliqida ötküzülgen g 20 döletler guruhi rehberler yighinida hasil qilghan pikir birlikige binaen barawerlik we özara hörmetni asas qilghan soda muzakirilirini qaytidin bashlaydu» dégenlerni qeyt qildi.

xitay terepning asasliq menpeet we endishlirining munasip shekilde muzakire qilinishi kéreklikini tekitligen gua fing, her ikki terepning barawer diyalog yoli arqiliq normal endishilirige étibar bérilgen teqdirde, mesililerge qarita her ikki dölet we xelqning menpeetige uyghun hel qilish charisi tapqili bolidighanliqini éytti.

gua fing her ikki terep heyetliri ariisida yéqin alaqe dawamlishiwatqanliqini bildürdi, lékin muzakirilerning qachan we qaysi döletning paytextide ötküzülidighanliqi heqqide melumat bermidi.

xitayning muawin bash ministiri lyu xé amérika maliye ministiri stéwén minuchin we amérika soda ishliri wekili robért laytizér bilen seyshenbe küni kéchide téléfonda körüshken hemde shi jinping bilen donald trampning yaponiyediki g 20 döletler guruhi rehberler yighinida kélishken témilirining emelge ashurulushi jehette pikir almashturghan idi.

xitay merkiziy maliye weiqtisadiy rehberler guruhi ishxanisi bashliqi shundaqla muawin bash ministiri lyu xé xitay hökümitining bash muzakirichisi bolush süpitide, xitay - amérika soda muzakirilirige riyasetchilik qilmaqta.

yaponiyediki g 20 döletler guruhi rehberler yighinida, shi bilen trampning uchrishishida soda muzakirilirini dawamlashturush qarari élinghan idi.

donald tramp 300 milyard dollarliq xitay mallirigha qoshumche tamozhna béji qoyush pilanini waqtinche tonglitip qoyghanliqini élan qilghan we kéyinche xitayning xuawéy shirkitige qaritilghan cheklimilerningmu emeldin qaldurulidighanliqigha dair yéshil chiragh yaqqan idi.

ikki dölet otturisida aldinqi yili mart éyida bashlanghan soda urushi özara qoshumche tamozhna béji qoyush heriketlirige sehne bolghan bolup, axirida bu urush xitayning téxnika shirketlirigiche kéngeygen idi.