pompéyo hamza yusufni kishilik hoquq mesililiri boyiche meslihetchilikke teyinlidi
amérika qoshma ishtatlirining tonulghan jamaet erbabliridin hamza yusuf tashqi ishlar ministirliqining kishilik hoquq mesililiri boyiche meslihetchilikige teyinlendi.
türkiye awazi radiyosi xewiri: amérika qoshma ishtatliridiki tunji islamiy uniwérsitét bolghan zeytune institutining qurghuchisi hamza yusufning, tashqi ishlar ministirliqi mayk pompéyo teripidin békitilgen 10 kishilik meslihetchiler sépidin orun alidighanliqi bildürüldi.
tashqi ishlar ministiri mayk pompéyo bu heqte bayanat bérip, meslihetchiler guruppisining perqliq étnik we diniy kimlikke ige kishilerdin teshkil tapqanliqini, meqsitining amérikining tashqi siyasitide kishilik hoquqning rolini tekshürüsh ikenlikini qeyt qildi.
ereb birleshme xelipiliki rehberlik apparati bilen ornatqan yéqin munasiwiti tüpeyli yéqinqi mezgillerde amérikidiki musulman jamaetchilikning éghir tenqidlirige uchrap kéliwatqan hamza yusuf, «pirézidént donald tramp rehberlikining siyasetlirige oyunchuq bolup béridighanliqi» ilgiri sürülüp eyiblendi.
prinséton uniwérsitétining islamiy ilimler piroféssori usame elazemi, hamza yusufning mezkur wezipini qobul qilishigha «gherb islamidiki detalashliq ehwal» dep baha bérip, «gherbtiki eng tonulghan we qobul qilinghan islam ölimaliridin birining amérika tarixining islamgha eng qarshi we parixor hökümiti bilen hemkarlishishi, musulmanlar teripidin asanla untulup ketmeydighan we kechürülmeydighan bir qarardur. bu ehwal, 11 – séntebir weqeliridin kéyin (jorj) bush hökümitige tewsiye bérip, nurghun musulmanni jumhuriyetchilerge awaz bérishke chaqirishtinmu nachar bir ishtur» dédi.
yusufning, «musulman jemiyetlerde tinchliqni teshebbus qilish munbiri» namliq ereb birleshme xelipiliki merkezlik bir organning yuqiri derijilik emeldarliri bashta bolup, ereb birleshme xelipiliki rehberliki we bashqa idare – organliri bilen yéqin munasiwitining bolushi diqqetni tartidu.
