xitayning xongkong waliysi xelqtin qayta kechürüm soridi

türkiye awazi radiyosi xewiri: xitayning xongkong  alahide memuriy rayoni waliysi karré lam axbaratqa élan qilghan bayanatida, hökümetning gumandarlarni qayturup bérishke alaqidar qanungha özgertish kirgüzüsh xizmetlirining xelq arisida qattiq qarshiliqqa we endishige seweb bolghanliqini tekrarlap, xongkong xelqidin kechürüm soridi.

karré lam mezkur qanun xizmetlirini resmiy halda emeldin qaldurmighanliqini, biraq uning bu qétimqi qanun chiqirish mezgilide küntertipke élip kélinmeydighanliqini éytti.

bezi gumandarlarning xitayda yeni chong quruqluqtiki sot mehkimiliride sot qilinishigha ruxset qilinidighan mezkur qanun teklipining xelqning ishenchisige érishelishining mumkin emeslikini étirap qilghan karré lam, xelqning ishenchisini almay turup qanun chiqirish xizmetlirini dawamlashturmaydighanliqini bildürdi.

karré lam: «bu qanun seweb bolghan qorqunch we endishiler tügitilmey turup, uninggha dair xizmetlerning ilgirilishige yol qoymaymen» dédi hemde xelqning qollishini qolgha keltürüsh üchün köp tiriship ishleydighanliqini eskertti.

xongkongdiki keng kölemlik namayishqa seweb bolghan «gumandarlarni xitaygha qayturup bérishni asanlashturush» qanun teklipi 3 – aprélda parlaméntqa sunulghan idi.

xongkong parlaméntida qanunning özgirishige qarshi chiqqan palamént ezaliri bilen qollighuchi parlamént ezaliri otturisida jédel chiqip nurghunlighan parlamént ezaliri yaridar bolghan idi.

öktichiler qayturup bérish qanunigha kirgüzülidighan bu özgertishning xongkongning erkinlikini yoqitish bilen oxshash ikenlikini ilgiri sürdi. xongkong emeldarliri bolsa, bir jinayetchining teywenge qayturulushi üchünmu bu özgertish kirgüzüshning zorurlikini ilgiri sürdi.

öktichiler eger qanun maqullanghan teqdirde, xitayning xongkongdiki öktichilerni bu qanun arqiliq hujum nishani qilidighanliqidin endishe qilmaqta.