wénézuélada öktichiliri parixorluq bilen eyiblendi
wénézuélada özini «waqitliq pirézidént» dep élan qilghan öktichi rehber xuen guaydoning armiyedin ayrilip kolombiyege qéchip ketken eskerlerni orunlashturush wezipisige teyinligen wekillerning parixorluq qilghanliqi ilgiri sürüldi.
türkiye awazi radiyosi xewiri: wénézuélada «insaniy kirizis» ni seweb körsitip yardem toplighan, hökümetni chiriklik bilen eyibligen, hakimiyetni örüsh üchün armiyege izchil halda herbiy özgirish qozghashni chaqiriq qilghan we döletning chet el küchi teripidin ishghal qilinishi üchün qanun tüzgen xuen guaydo rehberlikidiki öktichiler parixorluq bilen xatirilenmekte.
latin amérika qitesi heqqide we wénézuéla hökümitige qarshi axbarat tarqitish bilen tonulghan intérnét xewer tori «panama post» (Panam Pos) ta élan qilinghan maqalide éytilishiche, xuen guaydoning 23-féwraldiki muweppeqiyetsiz «insanperwerlik yardem» kirgüzüsh herikitige sehne bolghan kolombiyening kukuta (Cucuta) shehirige ewetken ikki wekil, iqtisadiy yardemlerni shexsiy chiqimliri üchün ishletken.
maqalide körsitilishiche, xuen guaydoning chégradiki toqunushlardin kéyin wénézuéla armiyesidin ayrilip kolombiyege qéchip ketken eskerlerni orunlashturush wezipisige teyinlengen ikki wekil, pullarni qimmet bahaliq kiyim-kéchek, heshemetlik turmush we aptomobil ijarige élish we méhmansaraylar üchün xejligen. buningdin bashqa, ikki wekil yene, kolombiyedin panahliq tiligen eskerler sanini köptürüp élan qilghan bolup, bu san eslide 1300 emes, belki 700 iken.
2019-yili 23-yanwar wénézuéla paytexti karakasta özini «waqitliq pirézidént» dep élan qilghan xuen guaydo bashchiliqidiki öktichiler, amérika kolombiyege ewetken insanperwerlik yardemlerni 2019-yili 23-féwral wénézuélagha kirgüzüshke tiriship muweppeqiyetke érishelmigen idi. insanperwerlik yardemlerni kirgüzüsh herikiti jeryanida, wénézuéla xewpsizlik tarmaqliri bilen öktichiler otturisida onlarche adem yarilanghan weqeler yüz bergen bolup, wénézuéla armiyesidiki bezi eskerler kolombiyedin panahliq tiligen. sani 1300 ge yetkenliki ilgiri sürülgen bu eskerler chégradiki kukuta shehiridiki méhmansaraylargha orunlashturulghan idi. bir mezgildin kéyin, wénézuélaliq eskerler méhmansaraylardin pulini tölimigenliki sewebidin chiqriwétilgen. bu xewer tarqalghandin kéyin, kolombiye hökümiti we b d t weqege ariliship mesile hel qilinghan idi.
wénézuéla eskerlirining qalaymiqanchiliqliri, xuen guaydoning eskerlerni tashliwétishi qatarliq mesililer kolombiye yerlik taratqulirida pat-pat küntertipke kelgen idi.
