jo baydin amérika pirézidéntliq saylimigha qatnishidighanliqini élan qildi

türkiye awazi radiyosi xewiri: jo baydin twittérda 2020-yili ötküzülidighan pirézidéntliq saylimida démokrat partiyesining namzat namzati bolidighanliqini élan qildi.

u: «bu döletning rohi üchün küresh ichide turuwatimiz. pirézidént trampning aqsarayda sekkiz yil turushigha ruxset qilsaq, döletning xaraktérini menggüge we ulidin özgertiwitidu. buninggha qarap turalmaymiz» dédi.

jo baydingha yéqin kishilerning bildürüshiche, sabiq muawin pirézidént saylam riqabitige qatnishish üchün barliq teyyarliqlirini pütküzgen.

uzun waqittin buyan saylam riqabitige qatniship-qatnashmaydighanliqi heqqidiki qarari zor qiziqish qozghighan 76 yashliq jo baydinning, saylam seperwerlik paaliyetliridiki asasliq témisini, amérika pirézidénti trampni yéngeleydighan we partiyeni bir yerge jem qilalaydighan birdinbir démokrat namzatining özi ikenlikige merkezleshtüridighanliqi qeyt qilinghan idi.

xelq rayini sinash netijilirige asaslanghanda, jo baydin démokrat saylighuchilar arisida eng köp qollashqa érishidighan kishi iken. monmaws uniwérstéti (Monmouth) élan qilghan bir tekshürüsh netijiside körsitilishiche, jo baydin démokrat saylighuchilarning %27 qollishigha ériship, tizimlikning béshidin orun alghan. wérmont (Vermont) ishtatidin kéngesh palata ezasi bérni sandérs (Bernie Sanders) %20 qollashqa ériship, tizimlikte ikkinchi orunda turghan. amérikada 2020-yili 3-noyabir 59-nöwetlik pirézidéntliq saylimi ötküzülidu. démokratlardiki nurghun siyasetchi uningdin burun partiyening namzat namzati bolush üchün özara riqabetlishidu.

jumhuriyetchilerdin pirézidént donald trampning ikkinchi nöwet pirézidént bolush üchün saylamda namzat bolidighanliqi kütülmekte.