népaldiki tebiiy apette jénidin ayrilghanlarning sanida éshish körüldi
31-mart (yekshenbe) népalning jenubigha jaylashqan bara we parsa rayonlirida chiqqan boranda jénidin ayrilghanlarning sani 35 ke chiqti.
türkiye awazi radiyosi xewiri: ANI agéntliqining yerlik hökümet mesullirining melumatlirini asas qilghan xewiride bildürülishiche, bara we parsa rayonliridiki yézilargha tesir körsetken shiddetlik yamghur we boranda 35kishining jénidin ayrilghanliqi, yüzlerche kishining yarilanghanliqi toghrilanghan.
yerlik hökümet mesulliri apette jénidin ayrilghanlarning yéqin-yoruqlirigha yardem qilinidighanliqini we yarilanghanlarning heqsiz dawalinidighanliqini uqturghan.
shiddetlik yamghur we boran sewebidin rayondiki nurghun öylerning buzghunchiliqqa uchrighanliqi yaki örülüp chüshkenliki, del-derexlerning qomurulup chüshkenliki, éléktir tüwrüklirining örülüp ketkenliki eskertildi. shuning bilen birge, rayon xelqining jiddiy yademlerge éhtiyajliq ikenliki bildürüldi.
népal saqchiliri ölüm-yétim hadisilirining köpinchisige boranda örülüp chüshken tamlar, öyning ögziliridin chüshken xish parchiliri, qomurulup chüshken derexler we örülüp ketken éléktir tüwrüklirining seweb bolghanliqini uqturghan idi.
népal bash ministiri xadga prasad sharma olining apettin qutquzush xizmetlirini tekshürüsh üchün apet rayonigha qarap yolgha chiqqanliqi bildürülgen idi.
népal döletlik jiddiy ehwallargha taqabil turush merkizi tünügün (1-aprél) boran sewebidin 612 kishining yarilanghanliqini, apettin qutquzush we yardem xadimlirining apetning ziyinigha uchrighan yézilargha ewetilgenlikini élan qilghan idi.
