nétanyahu gérmaniyening misirgha déngiz asti paraxoti sétip bérishige qoshulghan
isirailiye bash ministiri nétanyahu gérmaniyening misirgha ikki déngiz asti paraxoti sétip bérishige qoshulghanliqi toghrisida tarqalghan xewerlerning toghra ikenlikini bildürdi.
türkiye awazi radiyosi xewiri: isirailiye bash ministiri nétanyahu amérika ziyaritidin burun «12-isirail» qanilining mexsus pirogrammisigha qatniship, gérmaniye déngiz asti paraxotlirining misirgha sétip bérilishi mesilisini isirailiye dölet mudapie ministirliqidin mexpiy tutqanliqlirini inkar qilmidi. u: «misir her éhtimalda jenubiy koréye yaki bashqa döletlerdin déngiz asti paraxoti sétiwalatti. bénny gantz, yair lapid bolupmu moshé yalon we gabi ashkénazi méni dölet sirlirini ashkarilashqa mejburlawatidu, ular dölet bixeterlikini xeterge ittiriwatidu, buni ashkariliyalmaymen» dédi.
ötken hepte isirailiyening «13-qanal» téléwiziyeside élan qilinghan bir xewerge asaslanghanda, isirailiye dölet mudapie ministirliqi siyasiy we bixeterlik komitétining sabiq ministiri amos giled, nétanyahuning gérmaniyening misirgha ikki dane déngiz asti paraxoti sétip bérishige qoshulghanliqini éytqan. bu xewerdin kéyin, isirailiyede 2018-yili 9-aprél muddettin burun ötküzülgen saylamda, likudning reqibi ikenliki körsitilgen «kök-aq» ittipaqi, bash ministirni tekshürüshni telep qilghan.
nétanyahuning misirning gérmaniyedin déngiz asti paraxoti sétiwélishigha qoshulghanliqigha munasiwetlik xewerler burunmu küntertipke kelgen, biraq nétanyahu buni ret qilghan idi.
misir 2011-yili ikki dane déngiz asti paraxoti sétiwélish üchün gérmaniye bilen kélishim tüzgen bolup, birinchisi 2016-yili, ikkinchisi bolsa 2018-yili tapshurup bérilgen idi.
haréytz gézitining xewiride körsitilishiche, nétanyahu 2007-yili öktichi rehber bolup turuwatqanda, jiyeni nathan milikowsky teripidin merkiziy amérikaning téksas ishtatigha jaylashqan «sijift kok» (Seadrift Coke) shirkitidin paychék sétiwalghan. mezkur shirket déngiz asti paraxoti yasashqa ishlitidighan polat ishlepchiqiridighan bolup, kéyinche merkiziy oxayo ishtatigha jaylashqan grafték (GrafTech) shirkitige sétilghan. shu waqitta, grafték shirkitining misirgha déngiz asti paraxoti sétip bergen gérmaniye shirkitining teminligüchisi bolushi diqqet qozghighan.
bash ministir nétanyahu sijift kok shirkitining paychéklirini 2010-yili öktebir éyida satqanliqini ilgiri süridu.
eyni waqitta, sijift kok shirkiti isirailiye armiyesi déngiz asti paraxoti sétiwalghanda nétanyahu we uninggha yéqin hésablinidighan bezi kishiler üstidin erz qilghan, biraq teptish mehkimisi nétanyahuni aqlighan idi.
