afghanistanda pirézidént saylimi kéchiktürüldi
afghanistanda iyul éyida ötküzülüshi pilanlanghan pirézidént saylimi 28 – séntebir künige kéchiktürüldi.
türkiye awazi radiyosi xewiri: pakistanda ingiliz tilida chiqidighan «‹ Dawn › géziti» ning xewer qilishiche, afghanistan musteqil saylam komitéti teripidin chiqirilghan uqturushta, türlük mesililer sewebidin pirézidént saylimining belgilengen waqitta ötküzülüshining mumkin emesliki tekitlinip mundaq déyilgen: «saylam qanunining téximu yaxshi shekilde ijra qilinishi, saylamning ochuq - ashkara ötküzülüshi we saylighuchilar tizimlikining toluqlinishi üchün pirézidént, yerlik kéngesh we ghezne wilayiti üchün parlamént saylamliri 28 séntebir küni ötküzülidu.»
pirézidént saylimi deslepte 20 – aprél küni ötküzülidighanliqi uqturulghan, biraq kéyinche 20 – iyul künige kéchiktürülgenidi.
pirézidént saylimining amérika qoshma ishtatlirining afghanistan alahide wekili zalmay xelilzad rehberlikide taliban bilen ötküzülüwatqan söhbetning waqtini uzartish üchün kéchiktürülidighanliqi ilgiri sürülgenidi.
saylamda qaytidin namzat bolushni pilanlawatqan pirézidént eshref ghénining bayanatchisi, bu heqte élan qilghan bayanatida, hökümetning saylam komitétining qararigha hörmet qilidighanliqi hem hemkarliq ornitishqa teyyar ikenlikini éytti.
