yéngi zélandiyediki térrorluq hujumlirining körünüshlirini tarqatqan bir kishi nazaret astigha élindi
yéngi zélandiyening kirstchorch shehiridiki ikki jamege qilinghan térrorluq hujumlirining körünüshlirining ijtimaiy taratqularda tarqitilishigha chétishliqi barliqi ilgiri sürülgen bir adem nazaret astigha élindi.
türkiye awazi radiyosi xewiri: mehelliy taratqularning xewer qilishiche, jüme künidiki térrorluq hujumigha alaqidar tekshürüshler dairiside nazaret astigha élinghan 22 yashliq bir kishi, filim widéoliri we tarqitishlarni katégoriyeleshtürüsh qanunigha xilapliq qilish bilen eyiblenmekte iken.
saqchilar, bügün sotlinidighan mezkur kishining kimliki we sadir qilghan jinayitining mahiyiti toghrisida melumat bermidi.
térrorluq hujumliri feysbuk, yutiyub we twittér qatarliq ijtimaiy munberlerde tarqitilghanidi.
feysbuk, hujumlardin kéyinki deslepki 24 saet ichide dunya miqyasida bir yérim milyon widéoni öchürüp tashlighanliqini, 1 milyon 200 mingini bolsa, chiqirish esnasidila tosup qoyghanliqini bildürdi.
yutiyub we twittérmu munasiwetlik widéolarni öchürüp tashlaydighanliqini uqturdi.
yéngi zélandiyening kirstchorch shehiridiki ikki jame jüme namizi waqtida 10 minut waqit perqi bilen térrorluq hujumlirigha uchrap, 50 adem hayatidin ayrilghanidi.
