yawropa organlirining «tizimlik» detalashliri dawam qilmaqta
yawropa parlaménti, yawropa ittipaqigha eza döletlerning seudi erebistanni öz ichige alghan «térrorluqni maliye bilen teminligüchi we pul aqlashqa qarshi küreshte arqida qalghan döletler» tizimlikini ret qilishigha naraziliq bildürüp qarar maqullidi.
türkiye awazi radiyosi xewiri: firansiyening strasburg shehiride chaqirilghan yawropa parlaménti omumi kéngishi, yawropa ittipaqigha eza döletlerning diplomatik bésimlargha boyun égip, térrorluqning maliye menbesi we pul aqlashqa qarshi küreshte arqida qalghan döletler tizimlikini ret qilishigha naraziliq bildürgen qarar layihesini qol kötürüp awaz qoshush usuli bilen qobul qildi.
qararda, yawropa ittipaqi komitéti teripidin teyyarlanghan tizimlikning, siyasiy sewebler ilgiri sürülüp ret qilinmasliqi kérekliki tekitlendi.
tizimliktiki döletlerning tizimlikning qobul qilinmasliqi üchün lobichilik paaliyiti bilen shughullanghanliqi we bésim ishlitilgenliki tekitlengen bayanatta, lékin bu bésimning yawropa ittipaqi organlirining térrorning maliye menbesi we pul aqlash jehettiki kürishige tosqunluq qilmasliqi kérekliki tekitlep ötüldi.
qararda, tizimlikte rusiyening orun almighanliqi eskertip ötüldi.
yawropa ittipaqi komitéti, 13 – féwralda pul aqlash we térrorizmning maliye menbesige qarshi küreshte yéterlik rol oynimighan 23 döletni tizimlap chiqqanliqini uqturghanidi.
yawropa ittipaqi kéngishi bolsa, komitét teripidin teyyarlanghan bu layihe tizimlikning awaz birliki bilen ret qilinghanliqini bildürgen we mezkur tizimlikning «ochuq – ashkara we muwapiq shekilde teyyarlanmighanliqi nezerde tutulup, ret qilish qarar qilinghanliqi» ni jakarlighanidi.
tizimlikte afghanistan, amérika samoasi, bahamalar, botswana, ksh, éfiyopiye, gana, guam, iran, iraq, liwiye, nigériye, pakistan, panama, porto riko, samoa, seudi erebistan, sirilanka, süriye, tirinidad – tobago, tunis, amérika wirgin aralliri bilen yemenning ismi bar idi.
yawropa ittipaqidiki banka we bashqa maliye organliri, tizimliktiki döletlerning maliye organliri we xéridarlirining isimlirini kontrol qilish we tekshürüshni kücheytetti.
buningdin kéyinki musapide, yawropa ittipaqi komitétining eza döletlerning ensireshlirini nezerde tutqan halda yéngi bir layihe tizimlik teyyarlap chiqishi kütülmekte.
