iran: israiliye paraxotlirimizgha mudaxile qilip qalsa, qattiq inkas qayturimiz
iran mudapie ministiri emir xatemi, israiliye déngiz armiyesi iranning néfit yötkesh ishlirigha mudaxile qilghan teqdirde, buninggha «qaraqchiliq» dep baha béridighanliqlirini we qattiq jawab qayturidighanliqlirini bildürdi.
türkiye awazi radiyosi xewiri: iran resmiy xewer agéntliqi – irnaning soallirigha jawab bergen mudapie ministiri xatemi, israiliye bash ministiri bunyamin nétanyahuning «israiliye déngiz armiyesining iranning néfit etkeschilikige qarshi heriketke ötüsh éhtimali barliqi» toghrisidiki sözlirige inkas qayturdi.
téhranning israiliyening herqandaq mudaxilisige qarshi turalighudek küchke ige ikenlikini bildürgen xatemi, xelqara jemiyetningmu bu xil heriketlerni qobul qilmaydighanliqini éytti.
israiliye déngiz armiyesi néfit yötkesh xizmetlirige mudaxile qilghan teqdirde, buni déngiz qaraqchiliqi dep hésablaydighanliqlirini bildürgen xatemi, «iran bundaq bir ehwalda qattiq qarshiliq bildüridu» dédi.
israiliye bash ministiri bunyamin nétanyahu ötken hepte bayanat bérip, iranning amérika qoshma ishtatlirining émbargosigha déngizda néfit etkeschiliki qilish arqiliq xilapliq qilishqa urunuwatqanliqini ilgiri sürüp, « bu xil ehwallar köpiyip qalghan teqdirde, israiliye déngiz armiyesi iranning tirishchanliqlirining aldini élish jehette muhim rol oynaydu» dégenidi.
