wang yi qanundin qoral süpitide paydilinishni we qoydek yawash bolmasliqni telep qildi
xitay tashqi ishlar ministiri wang yi yéqinqi waqitlarda amérika-xitay soda muzakireliride ilgirilesh barliqqa kelgenlikini éytti.
türkiye awazi radiyosi xewiri: xitay tashqi ishlar ministiri wang yi béyjingda ötküzülüwatqan memliketlik xelq qurultiyi we memliketlik siyasiy meslihet kéngishining yilliq yighinliri dairisidiki axbarat élan qilish yighinida, xitay bilen amérika otturisidiki soda omumiy miqdarining ötken yili (2018) 630 milyard dollardin ashqanliqini bildürüp, ikki arisida özara hemkarliqning hazirmu asasiy téma ikenlikini qeyt qildi. u mundaq dédi:
«yéqinqi waqitlarda amérika-xitay soda muzakireliride ilgirileshler qolgha keltürüldi. bu ikki döletning barliq qatlamliri we xelqaraliq jemiyetlerning qizghin qarshi élishigha érishti. terepler özara hörmet qilish we barawer shertler astida muzakire ötküzüsh tirishchanliqini dawamlashturghan waqitta, ikki döletning hemme mesililirige qobul qilarliq chare-usullar tépilishi mumkin.»
u amérika-xitay munasiwetliri tarixida hemkarliq we sürkilishlerning barliqini eskertip: «biraq, biz bashtin tartipla özara hemkarliqni oxshimasliqlardin téximu muhim dep kelduq» dédi.
wang yi xitay téxnologiye shirkiti xuawéyning maliye ishlirigha mesul diréktori ming wenjuni qayturup bérish we amérikaning xuawéyning bezi mehsulatlirigha qoyghan cheklimiliri üstidimu toxtaldi. u mundaq dédi:
«yéqinqi künlerde mueyyen kishi we shirketlerni nishan qilghan heriketler addiy sot weqeliri emes, eksiche qesten qiliniwatqan siyasiy bésim.»
u xitay hökümitining shirketlirini we puqralirini qoghdash üchün zörrür tedbirlerning hemmisini alidighanliqini we muwapiq qanuniy menpeetlirini qetiylik bilen qoghdaydighanliqini eskertti. u: «shuning bilen birge, munasiwetlik shirket we kishilerning öz menpeetlirini qoghdash üchün <qanundin qoral süpitide paydilinishni> we <qoydek yawash bolmasliqini> qollaymiz» dédi.
u yene mundaq dédi:
«bügün qoghdishimiz kérek bolghini peqet bir shirketning menpeetila emes, belki bir döletning, bir xelqning tereqqiyat hoquqi. munasiwetlik tereplerge barliq döletlerning shirketlirige adil muamile qilip, bir tereplimilik muamile qilishtin waz kéchishni chaqiriq qilimiz.»
xuawéy mudiriyitining diréktor wekili go ping tünügün (7-mart) bayanat élan qilip, amérika kéngesh palatasining shirket mehsulatlirigha qoyghan cheklimige ispat bolalaydighan delillerni körsetmigenlikini bildürüp, téksastiki fédératsiye sot mehkimisige erz sunghanliqlirini uqturghan idi.
