yemen hökümiti b d t ni shie husiylargha bésim qilishqa chaqirdi

türkiye awazi radiyosi xewiri: yemen hökümiti birleshken döletler teshkilati we xelqara jemiyetni sitokholum kélishimining yolgha qoyulushi üchün shie husiylargha bésim qilishqa chaqirdi.

yemen resmiy agéntliqi-sabaning bu heqtiki xewiride bildürülüshiche, yemen muawin pirézidénti muhsin el ehmer bilen b d t yemen alahide wekili martin giriffitis seudi erebistanning paytexti riyadta körüshken.

körüshüshte wekil martin giriffitis, shie husiylarning sitokholum kélishimige xilapliq qilip hudeyde rayonidiki portlardin chékinip chiqishni ret qilip kéliwatqanliqini we xelqara jemiyetning bolsa bu hadisige süküt qiliwatqanliqini éytqan.

yemen hökümitining b d t gha masliship kéliwatqanliqini eskertken ehmer, hudeyde mesiliside sitokholum kélishimining yolgha qoyulushi üchün shie husiylargha bésim qilinishini telep qildi.  

muawin pirézidént ehmer, shie husiylarning sheher we portlardin chékinip chiqishining yéngi söhbetlerni bashlash üchün shert ikenlikini dédi.

yemen dairiliri b d t ning himayiside shiwétsiyening paytexti sitokholumda 2018-yili 6-dékabirdin 13-dékabirghiche ötküzülgen kéngesh yighinida esirlerni almashturush, hudeydede oq chiqirishni toxtitish, portlar we tayizgha munasiwetlik kélishim imzalighanidi.

hudeyde we etrapidiki rayonlar üchün bultur 18-dékabirda yolgha qoyulushqa bashlighan oq  chiqirishni toxtitish kélishimige asasen riaye qiliniwatqan bolsimu, biraq sheherdin chékinip chiqish mesiliside hazirghiche konkrét qedem tashlanmidi.

uzundin buyan siyasiy muqimsizliqqa sehne bolup kéliwatqan yemende, shie husiylar 2014-yili séntebirdin buyan paytext sena we bezi rayonlarni tizgini astida tutmaqta.