qatar seudi erebistanni dinni siyaset üchün suyiistémal qilish bilen eyiblidi
qatardiki döletlik kishilik hoquq komitéti, seudi erebistanning hej we ömre ibaditini siyaset üchün suyiistémal qilghanliqini ilgiri sürüp, buninggha qarshi xelqaradiki qanuniy organlargha murajiet qilidighanliqini élan qildi.
türkiye awazi radiyosi xewiri: qatardiki döletlik kishilik hoquq komitéti yazma bayanat élan qilip, komitét bashliqi eli bin samih elmerrining, yawropa ittipaqining diniy erkinliklerge mesul komissari jan figél bilen körüshkenlikini uqturdi.
merri uchrishishta, seudi erebistanning, qatar puqraliri bilen qatarda waqitliq olturaqlashqan chet elliklerning üch yildin buyan hej ibadetlirini ada qilish yollirigha bir qatar qiyinchiliqlarning tughdurulghanliqini we bu jehette héchbir ijabiy qedemning tashlanmighanliqini eskertti.
seudi erebistanning dinni siyaset üchün suyiistémal qilghanliqini ilgiri sürgen merri, riyad dairilirining bu siyasetlirige qarshi yéqinda yawropa parlaménti we b d t pen, maarip – medeniyet teshkilatigha murajiet qilish arqiliq qanuniy qedemlerni tashlaydighanliqini éytti.
u sözini dawamlashturup, «chiqip turiduki, ibadet erkinlikige tosqunluq qilghuchi irqchi ayrimchiliqning bir türige duch kelduq. pars qoltuqi elliri arisidiki idéologiyelik yarishishqa qarimay, seudi erebistan dairiliri yolgha qoyghan siyaset, siyasiy kélishmeslikler peyda qilghan yéngi bir ayrimichiliq türini otturigha chiqardi» dédi.
ötken yili iyul éyidimu seudi erebistanning qatarliq haji namzatlirigha qoyghan tosuqlirining bikar qilinishi üchün b d t qarmiqidiki orunlargha mektup yollighan merri, hej mewsumining yéqinlishiwatqan bolushigha qarimay, qatardin seudi erebistangha biwasite ayropilan qatnishigha qoyulghan cheklimining dawamlishiwatqanliqigha, ikki dölet arisidiki quruqluq chégrasining taqaq ikenlikige we hajilarning bu yerdin ötüshige ruxset qilinmighanliqigha, hajilarni éléktironluq tizimgha aldurush ishliriningmu qilinmighanliqigha isharet qilip ötti.
ötken yilqi weqedin kéyin seudi erebistan hej we ömre ishliri ministirliqi yazma bayanat élan qilip, qatar haji namzatlirining qatardin bashqa herqandaq bir döletning hawa yoli shirkitining ayropilanigha olturup jiddediki padishah abduleziz xelqara ayrodurumigha kelse bolidighanliqini uqturghanidi.
