shinzo abéi trampqa munasiwetlik soalgha jawab bérishtin özini qachurdi
yaponiye bash weziri shinzo abéi, donald trampni nobél tinchliq mukapatigha namzat körsetkenliki toghruluq chiqqan xewerlerge jawab bérishni ret qildi.
türkiye awazi radiyosi xewiri: yaponiye bash weziri shinzo abé, washingiton hakimiyitining telipige binaen amérika pirézidénti donald trampni nobél tinchliq mukapatigha namzat körsetkenliki toghruluq peyda bolghan xewerlerge jawab bérishtin özini qachurdi.
shinzo abé parlaméntta buninggha munasiwetlik soallargha mundaq jawab berdi: «nobél komitétining teklip bergüchiler we namzatlarni ashkarilmasliqqa munasiwetlik 50 yilliq siyasitige asasen bu soalgha jawab bérishni ret qilimen.»
buningdin sirt, parlaméntning asti qanitigha qarashliq xamchot komitétining yighinida trampni maxtighan shinzo abé: tramp shimaliy koréyening yadro we bashqurulidighan bomba pirogrammilirigha layiqida jawab berdi, bultur amérika we shimaliy koréye pirézidéntliri mexsus bu toghruluq yighin ötküzdi, dédi.
piyongyang hakimiyitining yaponiye puqralirini görüge éliwélish qilmishidin tokyo hökümitining qattiq biaram bolghanliqini we donald trampning yaponiye hökümitining bu biaramchiliqini pirézidént kim jongungha yetküzgenlikini, donald trampning rehberlik qabiliyitige hewes qilidighanliqini éytqan abé mundaq dédi: «tramp we aqsaray mesilini hel qilish üchün zor küch chiqardi.»
yaponiye hökümitining bayanatchisi yoshihidé sugamu, donald trampning shimaliy koréyeni yadro qoralliridin waz kechtürüsh üchün körsetken tirishchanliqigha aprin oqoydighanliqini bildürdi.
donald tramp, 15-féwralda aqsaray muxbirlarni kütüwélish yighini ötküzgende, yaponiye bash weziri shinzo abéning shimaliy koréye bilen diplomatik diyalog ötküzüsh üchün küch chiqirishi sewebidin, özini yaponiyege wakaliten nobél tinchliq mukapatigha namzat körsetkenlikini bildürgenidi.
sabiq amérika pirézidénti barak obamaning 2009-yili nobél tinchliq mukapatigha érishkenlikini eslitip ötken tramp: men bu mukapatqa héchqachan érishelmeymen, bu mukapat obamagha bérildi, rast gepni qilsam obamagha néme üchün bérilgenlikini obamaning özimu chüshinelmidi, obama pirézidént bolup 15 sékunt ötmeyla bu mukapatqa érishti, men bu mukapatqa layiq héchqandaq ish qilmidim, belkim bu mukapatqa héchqachan érishelmeymen, dédi.
yaponiyede chiqidighan asaxi shimbun géziti, donald tramp bilen kim jongunning bultur iyunda körüshüshidin kéyin, amérika hökümitining yaponiye hökümitidin donald trampni nobél tinchliq mukapatigha namzat körsitishi üchün «gheyriy resmiy halda telep qilghanliqi»ni xewer qilghanidi.
