haytida weziyet keskinleshti
haytida chiriklikke qarshi ötküzülgen namayishlarda weqe yüz bérip 4 adem öldi.
türkiye awazi radiyosi xewiri: haytida ötken heptidin buyan chiriklikke qarshi ötküzüliwatqan namayishlar esnasida yüz bergen toqunushlarda eng az 4 adem öldi.
«BBC»ning bu heqtiki xewirige qarighanda, paytext port-o-pirins we bashqa sheherlerde 4 kündin buyan 4000 adem namayish ötküzüp, wénézuéla dairiliri teripidin 2005-yili yolgha qoyulushqa bashlighan pétrokarib pirogrammisi sewebidin kélip chiqqan chiriklik qilmishini tekshürüsh xizmetlirining muweppeqiyetlik bolmighanliqi tüpeyli pirézidént jownél moyisning istépa bérishni telep qilghan.
namayishlarda chiqqan weqelerde 4 kishi ölüp, onlarche adem yarilanghan.
namayishchilarning yollarni tosuwélip aptomobil chaqlirini köydürüp, saqchilargha tash atqanliqi bildürüldi.
bezi taratqular namayishlarda 14 saqchiningmu yarilanghanliqi toghrisida xewer tarqatti.
namayishlar tüpeyli nurghun sheherde bu yil martning béshida ötküzülidighan paaliyetlerning bikar qilinghanliqi xewer qilindi.
haytida bultur oxshash seweblik kélip chiqqan namayishlarda toqunush yüz bérip 8 adem ölgenidi.
pirézidénti jowénél moyis, chiriklik délosini tekshürüsh xizmitining ongushluq bolmasliqi tüpeyli, istépa bérishini telep qilghan öktichilerni diyalog ötküzüshke chaqirghanidi.
hayti aliy palatasi teripidin élip bérilghan tekshürüshte, eng az 14 hökümet mesulining chiriklik qilmishi sadir qilghanliqi ilgiri sürülgenidi.
pétrokarib pirogrammisi rayon döletlirini néfit esliheliri qurush üchün iqtisadiy jehettin qollash meqsitide wénézuéla hökümiti teripidin 2005-yili qurulghanidi.
