nyuyorkta xitaygha qarshi namayish ötküzüldi
amérika qoshma ishtatlirida yashawatqan uyghurlar bilen türkler, xitay hökümitining uyghurlargha yürgüzüwatqan bésim siyasetlirige qarshi amérika qoshma ishtatlirining nyu york shehiridiki xitay konsulxanisi aldida naraziliq namayishi ötküzdi.
türkiye awazi radiyosi xewiri: ay – yultuzluq kök we qizil bayraqlarni kötürüshken namayishchilar, xitayning manxattandiki konsulxanisi aldigha yighilip, «sherqiy türkistangha erkinlik», «béshingni borap biperwa boluwalma», «uyghurlarni öltürüshni toxtitinglar» dégendek xetler yézilghan pilakatlarni chiqardi we shoarlarni towlap, uyghur türklirige qiliniwatqan bésimlargha xatime bérilishini telep qildi.
amérika islam topluqi milliy gürüsh (qarash) jemiyiti bashliqi ayhan özmekik namayishta söz qilip, xitay dölitining uyghur türklirige yürgüzüwatqan bésimini eyiblesh üchün yighilghanliqlirini eskertti we amérika islam topluqi milliy gürüsh (qarash) jemiyitining dunyaning barliq pirézidéntlirigha, bash ministirlirigha mektuplar ewetip, uyghur ilidiki zulumgha süküt qilmasliqqa chaqirghanliqlirini bildürdi.
kishilik hoquqqa munasiwetlik bir yighingha ishtirak qilish üchün gérmaniyedin nyuyorkqa barghan dunya uyghur qurultiyi bashliqi dolqun eysamu yillardin buyan uyghurlargha insan qélipidin chiqqan zulumlarning sélinghanliqini tekitlep, «birleshken döletler teshkilati (b d t)din, amérika qoshma ishtatliridin, türkiyedin we dunyaning bashqa döletliridin insaniyet namidin héchqandaq gunahi yoq turup qiyin – qistaqqa uchrawatqan, tutqun qilinghan uyghur xelqige ige chiqishlirini, xitaygha qiliwatqan bésimlirini toxtitish üchün bésim ishlitishlirini telep qilimiz» dédi.
