papa maduroning mektupi toghrisida toxtaldi
katolik dunyasining rohaniy rehbiri papa fransiskus, wénézuéladiki terepler kéliship telep qilghan teqdirde, muresseleshtürgüchilik rolini oynashqa teyyar ikenlikini bildürdi.
türkiye awazi radiyosi xewiri: papa fransiskus ereb birleshme xelipilikidiki ziyaritini axirlashturup rimgha qaytish yolida muxbirlarning soallirigha jawab berdi.
ispaniyening EFE xewer agéntliqining bildürüshiche, papa, wénézuéla pirézidénti nékolas maduroning dölitidiki weqelerge mudaxile qilishini telep qilip yazghan mektupini téxi oqumighanliqini bildürüp, «mektupni téxi oqumidim. némilerni qilishqa bolidu, qaraymiz» dégen we sözini dawamlashturup, «bir muresseleshtürgüchilik qilish üchün terepler (wénézuéla pirézidénti nékolas maduro bilen özini muweqqet pirézidént élan qilghan milliy mejlis bashliqi xuen guaydo) ning raziliqigha éhtiyaj bar. bashlanghuch shertliri nahayiti roshen. terepler buni telep qilsun, biz herdaim teyyarmiz» dégen ibarilerni ishletken.
muresseleshtürüshke ötüshtin ilgiri bezi kichik qedemlerning tashlinishi kéreklikini qeyt qilghan papa, «peqet watikanla emes, pütkül diplomatik terepler kichik bashlanghuch qedemelerni tashlishi kérek. biri yéqinlishish yene biri ötküzülgüsi diyalogni bashlitish üchün. diplomatiye mushundaq ilgirileydu» dédi.
yene bir tereptin, wénézuéla pirézidénti nékolas maduromu italiye Sky 24 qanili bilen ötküzgen söhbitide, «hezriti isaning xizmitide ikenlikimni bildürüp, papa firansiskusqa bir parche mektup yaewettim. rimgha, watikangha yétip bardi yaki bérish aldida dep oylaymen. bu ruh bilen diyalogning kücheytilishi we musapining asanlashturulushi üchün yardem telep qildim» dégenlerni bildürgenidi.
