ispaniye, engliye we firansiye xuen guaydoni étirap qildi

türkiye awazi radiyosi xewiri: ispaniye bash ministiri pédro sanchéz bash ministirliq sariyida bayanat élan qilip, wénézuéla dölet parlaménti bashliqi xuen guaydoning özini waqitliq pirézidént dep élan qilishini ispaniye hökümiti bolush süpitide resmiy étirap qilghanliqini élan qildi.

u: «xuen guaydo eng qisqa waqit ichide wénézuélada erkin, démokratik, ochuq-ashkara bolghan we bixeter saylam ötküzüshi kérek. xelqaraliq jemiyetning zimmisige chüshidighini, bu saylamni testiqlap, netijisige hörmet qilishi kérek» dédi.

engliye tashqi ishlar ministiri jérméy xant twittérda bayanat élan qilip, engliyening wénézuéla dölet parlaménti bashliqi xuen guaydoni wénézuélaning waqitliq pirézidénti dep étirap qilidighanliqini bildürdi.

firansiye pirézidénti makron bayanatida: «firansiye saylam musapisini bashlash üchün xuen guaydoni wénézuélaning waqitliq pirézidénti dep étirap qilidu» dédi.

wénézuélada öktichi we hakimiyet terepdarliri 23-yanwar (2019) ötküzgen namayishlar, dölet we rayon nuqtisidin éytqanda, nahayiti chong özgirishlerge seweb bolghan idi.

öktichiler üstünlükni igileydighan dölet parlaménti bashliqi xuen guaydo namayishta özini wénézuélaning «waqitliq pirézidénti» dep élan qildi. xuen guaydoning «waqitliq pirézidéntliqi» ni, amérika, kanada, kolombiye, péru, ékwador, paragway, biraziliye, chili, panama, argéntina, kostarika we giwatémala qatarliq döletler étirap qilghan idi.

méksika, türkiye, rusiye, xitay we kuba wénézuéla pirézidénti maduroni qollighan idi.

maduro karakastiki pirézidéntliq sariyining balkonidin qollighuchilirigha xitab qilip, amérika bilen bolghan barliq munasiwetlerni üzgenliklirini we amérika diplomatlirining 72 saet ichide wénézuéladin chiqip kétishi kéreklikini élan qilghan idi. u yene, kéyinki bayanatida, ikki dölet otturisida diplomatik munasiwetlerning axirlashqanliqini, emma soda munasiwetlirining dawamlishidighanliqini bildürgen idi.