beshshar esed küchliri idlibqa bolghan hujumini toxtatmidi
süriyede beshshar esed hakimiyiti bilen iranning qollishi astidiki térrorist guruppilar ning «idlib jiddiychilikni peseytish rayoni» chégraliri ichige jaylashqan turalghulargha qilghan top oqi bombardimanida, ikki kishi jénidin ayrildi, nurghun kishi yarilandi.
türkiye awazi radiyosi xewiri: beshshar esed küchliri sochi kélishimige xilapliq qilip, idlib jiddiychilikni peseytish rayoni ichidiki jerjenaz, el tuh we er ruffe rayonini top bombardimanigha tutti.
idlib puqralar qoghdinish teshkilatining mudiri mustafa haj yusuf tünügün (3-féwral) kechte beshshar esed küchlirining rayongha qilghan hujumini köpeytkenlikini éytti. u: «idlibning jenubiy terepliri top oqi bilen qattiq bombardiman qilindi. er ruffe yézisida kishilerning öylirige ot ketti. hujumda ikki kishi jénidin ayrildi, nurghun kishi yarilandi» dédi.
izdesh-qutquzush xadimlirining xarabiliq astida qalghan kishilerni qutquzush xizmetliri dawam qilmaqta. jénidin ayrilghanlar sanining éshishidin endishe qilinmaqta.
idlib puqralar qoghdinish teshkilatidin élinghan melumatlarda körsitilishiche, beshshar esed hakimiyitining yanwar éyida idlibqa qilghan hujumida, ikki kichik bala, üch ayal bolup, jemiy 19 kishi jénidin ayrilghan, 85 kishi yarilanghan.
beshshar esed küchliri türkiye bilen rusiye otturisida idlibtiki urush toxtitishni téximu mukemmelleshtürüsh üchün sochi kélishimi imzalanghan bolsimu, hujum qilishni toxtatmidi.
qoralliq öktichiler 2018-yil 17-séntebir imzalanghan sochi kélishimining telipi boyiche 10-öktebir belgilengen rayonlardin éghir tipliq qorallirini chékindürgen idi.
