amérikining «nahayiti perqliq tehditlerge duch kelgenliki» bildürüldi
washington dairiliri, amérika qoshma ishtatlirigha qarita xitayning armiyesini zamaniwilashturushi we rusiyening tesir sahesini kéngeytish tirishchanliqlirigha oxshash «nahayiti perqliq xewpler» ning barliqi toghrisida agahlanduruldi.
türkiye awazi radiyosi xewiri: amérika dölet bixeterlik gewdisini shekillendüridighan her xil organlarning aldinqi pilandiki xizmetliri békitilidighan dölet istixbarat istratégiyesi doklatida, amérikining «tehditler nahayiti perqliq we bir – biri bilen baghlinish halgha kelgen we barghanche éniqsiz we murekkeplishiwatqan bir dunyagha duch kéliwatqanliqi» eskertildi.
tehditler derijilerge ayrilmighan doklatta, ikkinchi dunya urushidin kéyin ajizlishishqa yüz tutqan xelqara tüzümdin paydilanmaqchi bolghan «eneniwi düshmenler» peyda qilghan tehdit we gherbte barghanche küchiyiwatqan abistrakitlashturghuchi mayilliqlar tekitlep ötüldi. doklatta, «rusiyening tesiri we salahiyitini kücheytish tirishchanliqlirining dawamlishish éhtimali bar, (bu) amérikining perqliq jaylardiki nishanliri we aldinqi pilandiki ishliri bilen zitlishidu» dégen ibarilerge orun bérildi.
shimaliy koréyening yadro qoraligha ige bolush istiki, amérika düshmenlirining küchiyiwatqan siber iqtidari we dunyadiki siyasiy muqimsizliqlar éhtimalliq dairisidiki xewpler dep qaralghan doklatta, xitayning tinch okyanda nopuz tiklesh tirishchanliqi we armiyesini zamaniwilashturushi mesililirige keng orun bérildi.
dölet istixbarat ishliri diréktori dan kots doklat bilen birlikte élan qilghan mektupida, amérika dölet bixeterlik dairilirining «dawalghushluq we murekkep» weziyetke maslishishi kéreklikige isharet qilip ötti. u, dölet ichi – sirtida muhim özgirishlerning yüz bergenlikini eskertip, «21 – esirning qiyinchiliqlirini yéngishqa, otturigha chiqqan tehditler we pursetlerni tonup yétishke teyyar bolushimiz lazim» dégenlerni sözlirige ilawe qildi.
amérika qoshma ishtatlirining dölet istixbarat istratégiyesi doklati her töt yilda bir qétim élan qilinidu.
