pompéyo daésh, shimaliy koréye we xitay bilen bolghan soda ixtilapi qatarliqlar toghrisida toxtaldi

türkiye awazi radiyosi xewiri: mayk pompéyo, amérika pirézidénti donald trampning waqitliq xamchot kirizisi tüpeyli fédératip hökümetning taqilishini seweb körsitip, shiwéytsariyede ötküzülgen dawos bashliqlar yighinigha heyet ewetmeslik qarari yüzisidin sin yighin yoli arqiliq 49 – nöwetlik dunya iqtisad munbirining mexsus bölümige ishtirak qildi.

sözi jeryanida ottura sherqte yéqinqi künlerde ötküzgen uchrishishliri toghrisida melumat bergen pompéyo, ittipaqdash küchlerge qétilghan döletler bilen birlikte suriye we iraqta daéshni meghlubiyetke uchratqanliqlirini eskertti we sözini dawamlashturup, «yene qilinishi kérek bolghan nurghun ish bar. silerning yardiminglar bilen ghelibe qilidighanliqimizni bilimen» dédi.

u, yemende dawamlishiwatqan ichki urushning bu yil axirliship – axirlashmaydighanliqi toghrisidiki bir soalgha jawab bérip, «(yemen mesiliside) ilgirilesh hasil qilidighanliqizdin nahayiti ümidwarmen» dédi.

mayk pompéyo, husiylarni dékabir éyida shiwétsiyening paytexti stokholmda imzalanghan tinchliq kélishimige riaye qilmasliq bilen eyiblidi.

u yene, bezi pars qoltuqi elliri we birleshken döletler teshkilati bilen birlikte yemen mesilisige chare tapidighanliqlirigha ishinidighanliqini qeyt qildi.

xitay bilen amérika arisidiki soda ixtilapigha xatime bérish meqsitide 30 – yanwarda paytext washingtongha baridighan xitay heyiti bilen ötküzülidighan söhbetlerdin ijabiy ünüm kütüwatqanliqini bildürgen pompéyo, aldimizdiki ayning axirida shimaliy koréye bilen ötküzülidighan yadro söhbetliridimu téximu köp ilgirilesh hasil qilishni kütüwatqanliqini tilgha élip ötti.

u, fédératip hökümetningmu nahayiti qisqa waqit ichide qaytidin échilidighanliqigha ishinidighanliqini sözlirige ilawe qildi.

bu yil 49 – qétim ötküzülgen dawos bashliqlar yighinigha 110 dölettin 3 mingdin artuq soda – sanaetchi, siyasetchi, tetqiqatchi we ijtimaiy küchler bashqurushidiki organlarning wekilliri ishtirak qilmaqta.