xitay amérikani ming wenjuni kanadadin qayturup bérishni telep qilmasliqqa chaqirdi

türkiye awazi radiyosi xewiri: xitay hökümiti amérika hakimiyitini xuawéy guruhining maliye ishliri mudiri ming wenjuni kanada dairiliridin qayturup bérishni telep qilmasliqqa chaqirdi.

xitay tashqi ishlar ministirliqi xua chunying béyjingda muxbirlarni kütüwélish yighini ötküzüp, ming wenju weqesining adettiki jinayet délosi emeslikini bildürdi.

amérika we kanada hökümetlirining jinayetchilerni qayturup bérishke munasiwetlik kélishimlerge zit ishlarni qiliwtqanliqini yaqlighan xua chunying, amérika we kanadaning bu qilmishining xitay puqralirining shexsiy bixeterlik, qanuniy heq-hoquqliri we menpeetlirini depsende qilishtin dérek béridighanliqini eskertti.

béyjing dairilirining kanada hökümitidin xuawéy guruhining maliye ishliri mudiri ming wenjuni burunraq qoyup bérishni telep qilghanliqini éytqan bayanatchi xua chunying: amérikani xataliqini tüzitishke we kanada hökümitidin ming wenjuni qayturup bérishni telep qilmasliqqa chaqirimiz, dédi.

bayanatchi xua chunying, amérika hökümitining xuawéydin ibaret xitayning eng ilghar téxnologiye shirkitige bésim qilishining toghra emeslikini éytti.

bayanatchi yene kanada qatarliq bir qisim döletlerning xitayda tutqun qilinghan kanadaliq sabiq diplomat maykél kowrig we karxanchi maykél spawor qatarliq kishilerni qoyup bérishini telep qilishining, emeliyette xitayning igilik hoquqi we ichki ishlirigha arilishish bolidighanliqini yaqlidi.

xitayning eng ilghar téxnologiye shirketliridin bolghan xuawéy guruhining xojayini rin jingféyning qizi we xuawéy guruhining maliye ishliri mudiri ming wenju, amérikaning irangha qaratqan émbargo siyasitige zit qilmishlarni sadir qilish bilen eyiblinip, bultur 1-dékabirda kanadaning wankowér shehiride tutqun qilinghanidi.

kanada sot mehkimisi 10 milyon kanada dolliri kapalet puli bérish sherti astida, ming wenjuni qoyup bérishni qarar qilghanidi.

kanadaning washingiton elchisi déywid maknagton, tünügün yazma bayanat élan qilip amérikaning xuawéy guruhining maliye ishliri mudiri ming wenjuni kanada hökümitidin qayturup bérishni resmiy telep qilghanliqini bildürgenidi.